Ujaqqerituut killilersorneqarusunngillat

Taamaammat nunaqavissut sumiluunniit ujarattarnissamut pisinnaatitaaffeqarnissaat inatsisillu paatsuugassaanngitsut pilersinnissaat namminersulinnginnermi qulakkeeqqaartariaqarsoraat.

Atsiortitsinernik katersilernerminnut atatillugu peqatigiiffik taamaalilluni aamma oqallissaariniarpoq. Peqatigiiffimmi siulittaasuugallartoq Inga Egede ima oqarpoq.

- Inuinnaat ujaqqanik katersuisinnaanissamut periarfissaqarniassammata taamaaliorpugut. Ujaqqat naleqalaartut massakkut katersoqqusaannginnatsigit, Inga Egede oqarpoq.

Ukioq ataaseq qaangiuppoq peqatigiiffimmik aallartitsisut tallimaallutik Qeqertarsuatsiaat eqqaani ujarattariarnerminni peersitaagamilli, katersaminnillu arsaagaallutik.

Isumaqarput Canadamiut rubineqassutsimik misissuinissamut taamaallaat akuerisaasimammata namminneq aamma tigooqqaasinnaasimagaluarlutik.

Canadamiummi piaalernissaat akuerineqarsimanngilaq.

- Canadamiut rubinisiortut suli minedriftiunngillat. Undersøgelsesstadium-imiinneranni uagut qaqqaliaqqusaagatta taamaaliorpugut. Kisianni politiit Aatsitassanullu Pisortaqarfimmeersut peeqqusipput.

- Uagut inatsisit uniunngitsutut isigaavut, misissoreernikuullugit tappavunnaratta. Oqartussat politiillu peersikkamisigut kukkusumik iliorput, Inga Egede oqarpoq, nangillunilu.

- Ujaqqat kusanarnerit pigeqqusaanngilagut, kusanaannerilli pigisinnaallugit. Taanna naammagisinnaanngilarput. Ujaqqat kusanaraangata tassa igeqqittassavagut, kusanaakkaangatalu kaasarfitsinnut ikisinnaallugit.

- Nammitsinnik nassaagut pigerusuppagut tunisinnaasagullu tuniniarlugit. Aamma angajoqqaatta, maanna ilaasa toqoreersut, katersorsimasaat pigerusuppagut piumasatsinnillu tuniniaasarusulluta, oqarpoq.

Namminersorneq pillugu taasisitsinnginnermi ujaqqerituut pissutsinik allanngortitserusupput.

- Taanna tikitsinnagu allanngortiterilaarusukkaluartugut, ujaqqerituut peqatigiiffiat 16. august maanna 20-inik ilaasortalik sinnerlugu Inga Egede taama oqarpoq.

16. august atsiunneqarpoq ulloq taannaammat siorna 2007-imi ujaqqerituut tallimat Qeqertarsuatsiaat eqqaanni ujarattartillutik qimaguteqqusaaffigisaat.

Nunataq Canadamiut rubinisiorfigimmassuk, taama Aatsitassanut Pisortaqarfik politiit suleqatigalugit ujarattarnissamut inerteqquteqalersitsisuupput.

Atsiortitsiortorneq niuertarfinni pappiaqqatigut ingerlanneqarnermi saniatigut nittartakkami www.sten.underskrifter.dk –mi pisinnaalereerpoq.