Ujaqqerisoq ujaraataanik arsaarneqartoq

Ujaqqanik katersisartoq Kalaallit Nunaanniit rubininik 4,9 kilonik nunanut allanut naliliisitsiartulersoq, Aatsitassanut ikummatissanullu pisortaqarfimmit unitsinneqarluni ujaraataanik, 2007-imi oktobarip qaammataani arsaarneqarpoq. Tamanna pivoq naak ujaqqerisup nunanut allanut tunisisinnaaneranut akuersissummik pisortaqarfik nammineq tunisisimagaluarluni.
novembarip 04-at 2008 14:53

Ujaqqerisoq, Thue Noahsen ullumi imatut oqaluttuarpoq. - 5 kilo tikillugu annissinissannut akuersissummik peqarama atoriaraluarpara annissillunga, Thue Noahsen oqaluttuarpoq. Kangerlussuarmi politiinit akuerineqarpunga timmisartorsuarmullu ikillunga. Sulili aallanngitsugut Aatsitassanut pisortaqarfimmeersunit takkukkamik unitsippaannga ujaqqallu tiguneqarlutik. Taakkua oqaraluarput misissoriarlugit tigoqqissinaassagikka, kisianni taamaaliortoqanngilaq. Taava kingorna allagarsivunga akuersissummik peqarnaga katersisimasunga. Uangali akuersissummik peqarniannguarlunga, taamaammat paasiuminaatsippara susoqarnersoq. Ajortuliorsimanerlungaluuniit paasiuminaatsippara. Politiit atsioqqugaluarpaannga ujaqqat arsaarinissutiginiarlugit, kisianni atsiorusunngilanga ujaqqat taakkua pappiaraqarfiginikuugakkit, eqqungitsoqarmat atsiorusunngilanga. Ujaqqat maannakkut sumiinersut naluakka, politiiniingikkunik Aatsitassanut pisortaqarfimmiissapput. Aana saanniippoq atsioqqusaagaluaq, kisianni atsiussanngilanga, Thue Noahsen oqarpoq.

Thue Noahsenip Aatsitassanut pisortaqarfiup saaffiginninnissaa utaqqiinnarpaa.