Ujaqqat uranitallit Kuannersuarneersut nittartakkami tuniniarneqarput

Nittartagaq stenbutikken ujaqqanik qinngornernik navianartulinnik akulinnik atuarfinnut ilinniarfinnullu tuniniaavoq, soorlu aligoqqiit aappalaartut Qeqertarsuatsiaaneersut nittartakkatigut aamma tuniniarneqartartut:

- Ujaqqanik katersisartuujuarnikuuvunga. Pissanganaqigamik, pingaartumik ujaqqat qinngornernik navianartortallit, taakkuummatami avataarsuup nunarsuullu pinngoriartorneranik oqaluttuartut, Mads Trans oqarpoq.Taanna stenbutikken.dk-mik Københavnip eqqaani Bagsværdimiittumik piginnittuuvoq.

Mads Trans ujaqqanik nunarsuarmi sumi tamaani katersaminik tuniniaasarpoq, soorluttaaq ujaqqat pillugit atuarfinni oqalugiartartoq.

Mads Trans oqaluttuarpoq ujaqqanik katersiartorluni siorna Narsamiissimalluni, tassanilu ujaqqanik Kuannersuarni piaaffiup eqqaaniittunik katersisimalluni:

- Aningaasat kaaviiaartitat amerlanngillat. Inuit ujaqqanik tamakkuninnga pisiumasartut ukiumut marluk sisamallu akornanniittarput. Ilinniarfiit ilinniartitsinissamut atugassaminnik pisisarput, Mads Trans oqarpoq.

Mads Trans ujaqqanik uranitalimmik katersisinnaanissamut akuersissuteqanngilaq. Inatsisit maleruagassallu tamakkununnga tunngasut ersarluppallaarnerarpai:

- Aatsitassanut Ikummatissanullu Pisortaqarfimmiit uannut saaffiginnittoqaqqammerpoq. Aligoqqinnik aappalaartunik Qeqertarsuatsiaaneersunik uranimillu Kuannersuarneersunik nittartakkatigut nioqquteqarnera naammagittaalliuutigineqarsimasoq oqaatigineqarluni, Mads Trans oqarpoq.

Aatsitassanut Pisortaqarfiup saaffiginninneranut atatillugu Mads Trans akivoq:

- Inerteqqutigisinnaanngilaat. Pisut pereerput, ujaqqallu angerlaatereerlugit, Mads trans Radioaviisimut oqarpoq.

Aatsitassanut Ikummatissanullu Pisortaqarfimmik immikkoortortami pisortaq John Telling, suliamut atatillugu oqaaseqarsinnaannginnerarpoq, oqaatigaluguli ujaqqanik uranitalimmik Nunatsinniit nioqqutissiornissamik akuersisaratik.