Ujaqqat rubinit nalinginnaq piiaqqusaannginnerat kamaatigineqarpoq

- Inatsit maannakkut imaakkami ujaqqat erlinnartut aatsaat akuersissuteqarnikkut katersorneqarsinnaallutik assersuutigalugu diamantit rubinillu. Ujaqqalli allat assersuutigalugu nuummitsit, ukkusissat, tuttupitsit akuersissuteqaqqaarani katersorneqarsinnaapput aamma taanna allanngortinniarsarinngilarput, John Telling Aatsitassanut Pisortaqarfimmi immikkoortortami pisortaq nassuiaavoq.

Canadamiut piginneqatigiiffiat True North Gems immikkut akuerisaalluni Kalaallit Nunaanniit rubininik annissuisarpoq, taakkulu pisortaqarfimmiit malittarineqarput Thailandimilu rubininik qillersaassappata malittarineqartarput.

Nunaqavissulli rubinimik katersissappata killissaat sumiippa?

- Inatsisit najoqqutaralugit akuersissummik peqqaartigatik rubininik katersisinnaanngillat, akuersissut maannakkut atuuttoq suliffissuarnut naleqqussagaaneruvoq. Maannakkut najoqqutassanik suliaqarpugut taamaalilluta piuminartumik akikitsumillu rubininik diamantinillu katersisoqarsinnaanissaa ammaaffiginiarlugu, John Telling oqarpoq

Tassalu inatsit taannavooq ujaqqanik katersisartut kamaatigisaat.

Niels Eske Madsen ujaqqanik katerserusukkaluarpoq:

- Ujaqqanik erlinnartunik nassaarusuttunut inatsit suli ajorpoq. Tassami taamaattuuteqarutta inupilunngortitaassaagut, naak siornali aggustip 16-iat sioqqullugu ujaqqanik qanorsuaq tigooqqaanissarput ajorineqanngikkaluartoq, Niels Eske Madsen oqarpoq.

Taanna aamma oqarpoq Thailandimiumut immikkut ilimasalimmut ujarak nassaani nalilertikkamiuk oqarfigisimagaani ujarak taanna millionærinngussutigisimasinnaagaluaraa. Taamaattoqarsimagaluarpallu nunatsinni akileraarutit aqqutigalugit nunatsinnut aamma iluaqutaasimasinnaagaluartoq, akerlianik avammut annissuisut akileraarutit aqqutigalugit nunatsinnut iluaqusiinavianngitsut.

- Aaqqiagiinngilernerput uannga tunngaveqarneruvoq, ujaqqat erlinnartut annikitsuugaluilluunniit nalitoorujussuusinnaammata tamakkua tamatta pigigatsigit taavalu iluamik akileraartoqarniassammat taakku inatsisit atuupput, John Telling oqarpoq.

Inuit nalinginnaat rubinimik annertuumik tigusiniarunik tamannalu iluanaarutiginiarunikku taava 100.000 koruuninik pisortanut akileeqqaassapput.

Inatsit pineqartoq 1964-ernisaavoq kingullermillu taamanili inatsit najoqqutariinnarlugu 1998-mi ilaneqarpoq.

Namminersulernissarlu eqqarsaatigalugu tamatuminnga inatsisissaq pillugu suliaq ingerlanneqartoq erseqqissaatigineqarpoq.

Siunnersuisooqatigiit novembarip tallimaanni tamanna pillugu eqqartueqatigiissapput.