Ujaqqat pisoqaassusii misissorneqassapput

Issittuni pissutsinik ilisimatusarfimmeersut ujaqqanik ukiunik 50 aamma 70 millioninik pisoqaassusilinnik 250 kiilunik katersisimapput.

Lektori Paul Martin Holm Geologisk Institutimeersoq, suleqataalu tallimat Kap Kanemi Station Nordimiit 400 kilomiiterinik ungasitsigisumi sapaatit akunnerini marlunni ujaqqanik katersisimapput, ujaqqat taakku Kalaallit Nunaat Amerikamit Avannarlermit avissaarmalli pinngortuusimapput.

Tamaani 1979-mi kingullermik ujaqqanik misissuisoqarpoq, taamanerniilli ujaqqat pisoqaassusii pitsaanerusumik maanna eqqoriarneqarsinnaanngorsimapput. Ujaqqallu 250 kiilut maanna katersorneqartut Danmarkimukaanneqassapput, qanoq pisoqaatigineri sukumiinerusumik oqaatigineqarsinnaannngorniassammata.

Ujaqqat qaqqat innermik anitsisarnerinit pinngortuupput. Innermik anitsinermi ataatsimi aanngamik ima annertutigisumik pinngortoqarsimavoq, Danmark tamaat 25 meterimik qallersinnaallugu.

Ujaqqanit katersanit nutaamik ilisimasaqalernissaq ilimanarluinnarpoq, soorlu nunavissuit sooq quppatsitertarnersut, immat qanoq pinngortarnersut, qaqqallu innermik anitsigaangata pinngortitarsuarmi susoqartarnersoq, Paul Martin Holm oqaluttuarpoq.