Ujaqqanik saqqummersitsineq ornigarneqarluartoq

novembarip 06-at 2005 17:05

Nunatsinni ujaqqanik katersisartut peqatigiiffiat Sisimiuni sapaatip akunnerata naanerani Sanaartornermik Ilinniarfimmi saqqummersitsipput. Saqqummersitsinermi nerriviit saqqummersitsinerillu aqqaneq marluullutik.

Saqqummersitsinermi nunatsinni peqatigiiffimmut ilaasortaasut illoqarfinnit assigiinngitsuneersut saqqummersitsinermi aamma peqataapput, ukioq mannalu assigiinngitsorpassuit saqqummersinneqarput.

-Iverutit, ujammit, saqqarmiut taavalu illup iluani pinnersaataasinnaasut, soorlu puilasuaqqat qulliillu saqqummersinneqarput tuniniagaallutillu, Inunnguaq Lyberth saqqummersitseqataasoq oqaluttuarpoq.

Ujaqqat saqqummersinneqartut nunatta avataaninngaanersut amerlasoorpassuupput, soorlu ametyst-it ilaallutik. Nunatsinneersut saqqummersinneqartunut ilaapput tuttupitsit, nuummitsit grønlanditsillu.

-Ukiuni siuliinitulli ujarak tuttupitsi soqutigineqarnerpaanut ilaavoq, aamma tusaamaneqarluarami, kisianni aamma nutaatut ”satellitsten”-imik atilik soqutigineqarluarpoq. ”Satellitsten”i nunatsinneersuuvoq, qimerlooraannilu allaavinnginnami nunarsuarput avataaninngaanniit isigalugu, taanna ”satellitsten”imik ateqaatigivaa, Inunnguaq Lyberth oqarpoq.

Ukioq manna ujaqqanik saqqummersitsinermi inuit 300-t missaaniittut alakkaassimapput, naatsorsuutigineqarporli alakkartut amerlanerussasut, saqqummersitsinermi unammisitsisoqarsimanera peqqutigalugu.

Nunatsinni ujaqqanik soqutigisallit peqatigiiffiat 300 missaanik ilaasortaqarput.

Ukioq manna qulingiluassaanik ujaqqanik saqqummersitsisoqarpoq, aappaagulu qulinngortorsiornermi annertunerusumik saqqummersitsisoqarnissaa naatsorsuutigineqarpoq.