Ujaqqanik katersisartunut tusagassaq nuannersoq

Nalunaarutissaq aatsitassat pillugit inatsimmit aallaaveqarpoq.

Malittarisassat nutaat malillugit inuit nunatsinni aaalajangersimasumik najugaqartut takornariallu aatsitassanik ujaqqanillu kaanngarsimasunik katersuisinnaapput. Aatsaalli inuussutissarsiornermut atatillugu taamaaliunngikkunik, tassalu aningaasarsiutigissanngilaat.

Aappaatigulli. Ujaqqanut pinnersaasiassanut sumiiffinniluunniit aatsitassanut kisermaassilluni misissuinissamut piiaanissamulluunniit inatsit malillugu akuersissuteqarfiusuni alajangersagaq atuutinngilaq. Uanilu pinnersaasiortartorpassuit, aatsitassanut inatsit naapertorlugu piiaanissamut piginnaatitsissummik annikitsumik akuersissummik pigisaqartut, eqqarsaatigineqarput. Taakkua Nunatta sannaata nittarsaannissaa kiisalu ujaqqanik katersisitsinissaq siunertaralugu sumiiffiup akuersissuteqarfiusup iluani takornariartitsisinnaapput.

Piginnaatitsissummik pigisaqartoq takornariartitsereeruni uppernarsaammik, Pisortaqarfimmit akuerisaasumik, tunniussisinnaavoq. Uppernarsaat inatsisit malillugit katersisimanermut uppernarsaataavoq, qinnuigineqarnikkullu takutinneqartartussaalluni. Malittarisassaq taanna malillugu aatsitassamik annerpaamik 2 kilomik nunatsinniit  annissisoqarsinnaavoq.

Aammali allassimavoq, inatsisit malillugit ujaqqat katersorneqarsimasut suliareqqinneqarsimasut, nalingi eqqumiitsuliornermik aallaaveqarpata, avammut aallarunnissaannut akuersissuteqarnissaq piumasaqaataanngitsoq.

Akerlianilli ujaqqat suliarineqarsimasut, suliat ataatsimoortut nalinginut annertuumik naleqartitsisunik ujaqqanik erlinnartunik akoqartut, pissarsiarineqarsimanerinik inatsisit malillugit uppernarsaammik ilaqartinneqassapput. Piginnaatitsissummik annikitsumik akuersissuteqartumit uppernarsaat imaluunniit tunisisumit akiligassiissut uppernarsaatigineqarsinnaapput.

Sulilu pappialartorneq ingerlaqqissaaq, nunatsinni aalajangersimasumik najugaqartut, ujaqqanik kaanngarsimasunik katersisimasut, nunatsinniit aallaraangata. Tassami taakkua aallaraangamik pequttaminnut ilanngullugit 50 kilonik nassarsinnaavaat. Ujaqqalli suussusaat amerlassusaallu immersugassami, Aatsitassanut Pisortaqarfimmi pissarsiassami immersorneqassapput.

Aamma ilerrit ujarattassaat pappialarsornarput. Nunatsinni aalajangersimasumik najugaqartut aatsitassanut pisortaqarfimmiit akuerineqarlutik ujaqqanik nunanut allanut annissisinnaapput, avammut aallarussinissami inuup Kalaallit Nunaannut immikkut attuumassuteqartup ataqqiniarneqarnera tunngavilersuutaappat.

Nalunaarutissaq juulip aallaqqaatata tungaanut tusarniaassutigineqarpoq.