Ujaqqanik katersineq malittarisassaqalissaaq
Aatsitassanut Pisortaqarfik nalunaarpoq ujaqqanik katersisarneq pillugu ilitsersuusiornissaq siunertaralugu suleqatigiissitaliorlutik. Taamatut sulinissami pinnersaasiortarnerup aatsitassarsiornerullu akornanni nalorninarsinnaasut sammineqassapput.
Ujaqqanik katersisarneq pillugu pissutsit ajornannginnerulernissaat pisariinnerulernissaallu qangali kissaatigineqartarpoq. Taamaalilluni ujaqqanik pinnersaasiortartut katersisartullu ujaqqanik erlinnartunik aatsitassanillu assigiinngitsunik katersinermi suut akuerisaanerinik suullu akuerisaannginnerinik ilitsersorneqassapput.
Aatsitassanut pisortaqarfiup aamma katersisarneq pillugu aatsitassanillu nunanut allanut tunisisarneq pillugu nutaamik ilitsersuusiorpoq akuersisarnermilu najoqqutassanik suliarinnilluni. Najoqqutassiornikkut katersinermi, tuniniaanermi nunattalu avataanut tuniniaanermi piumasaqaatit ersarissarneqassapput.