Ujaminnassinnaasunik sulorartartut ujaasissapput
Kingullermik Island Gameseqarnerani kalaallit sulorarnermi ataasiinnarmik ujaminnapput Bror Madsen angutit ataasiakkaarneranni sølvinnammat. Maanna aasamut Bermudami Island Gameseqarnissaani ujamminik amerlanerusunik pissarsinissaq siunertaralugu sulorartartut piareersarnialerput.
Immikkut toqqakkat 16-it februaarip qaammataani Islandimut sungiusariaqssapput tassanilu nuna tamakkerlugu sungiusaasumut takutinniartussaavaat Island Gamesimut peqataanissamut piukkunnassuseqarlutik.
- Iligiit Kalaallit Nunaat sinnerlugu ujaminnassinnaasariaqassapput. Tamanna nalorninata anguniarparput, nuna tamakkerlugu sungiusaasoq Bjarne Nielsen oqarpoq.
Island Gamesimut peqataasussat Ilulissani GM-ip kingorna toqqarneqassapput Island Gamesimullu peqataaniartunut piumasaqaataavoq GM-imut peqataanissaq. Islandimulli angalanissaq aamma aalajangiisooqataajumaarpoq Island Gameseriartussanik toqqaanissami aammali Islandimut angalaqataanngitsut suli periarfissaqarput.
- Sungiusarluarit GM-imilu ajugaanissamut piumassutsimik takutitsillutit taamalu Island Gamesimut peqataasinnaanerit takutillugu, nuna tamakkerlugu sungiusaasoq kajumissaarivoq.
