Ujaminnanniarneq atuarfimmi sammillugu
Illoqarfiit aalajangersimasut timersuutinik aalajangersimasunik piareersarfittut toqqaraanni 2016-mi Arctic Winter Games-eqarnerani angusarissaartoqarsinnaavoq.
Illoqarfiit aalajangersimasut timersuutinik aalajangersimasunik ingerlatsilluarput nukittuffiillu taamatut ittut atorluarneqarnissartik utaqqiinnarpaat.
Assersuutitut taaneqarsinnaapput Aasiaat sisoraatinik oqilaniunnermi misilittagaqarluartut. Aamma Ilulissat Arctic Sportsip illoqarfiatut taaneqarsinnaapajaarpoq kiisalu sulorallammaat arsaatillammaallu Nuummi katersuuttarlutik.
- Taamaammat Grønlandsk Skoleidrætimiit siunnersuutigaarput inuusuttut piukkunnartut 2003-miit 1999 ilanngullugu inunngortut nassaarineqassasut 2016-mi Arctic Winter Gameseqalerpat ujaminnassinnaasutut piukkunnaatillit. Tamanna pisinnaavoq atuarfik aamma klubbiat aqqutigalugit, taama oqarpoq Kim Godtfredsen Grønlandsk Skoleidrætimeersoq.
- Grønlandsk Skoleidrætimiit isumaqarpugut taakku atuarneranni sapaatip akunneranut akunnerit marluk sisamalluunniit atorlugit timersuumminnik ingerlatsisassasut. Tamanna taaguuserneqarsinnaavoq AWG Skolesport, taama siunnersuuteqarpoq Kim Godtfredsen.
Taanna aamma isumaqarpoq timersuutit takussaannginnerusut soorlu basketball imaluunniit aputisiutinik oqilaniunneq allallu ingerlanneqarsinnaalluartut.
Tullianik Arctic Winter Games ingerlanneqassaaq 2012-imi Yukon-imi illoqarfimmi Whitehorse-mi.
