Ujakkaartartut tallimat AWG2016-imut peqataasussatut toqqarneqartut
Nunatsinni Sisorartartut Kattuffianni nunanut allanut unammisartut sungiusaasuat Øystein Slettemark, ikiortini Andrie Sørensen aamma Salik Olsen peqatigalugit ujakkaartartunik 17-inik inuusuttuaqqanillu sisorartartunik marlunnik Sisimiuni piffissami decembarip arfineq-aappaanit 13-iata tungaanut katerisimaaqateqaqqammersoq taama oqaluttuarpoq.
Sungiusaatit assigiinngitsut arlallit saniatigut katerisimaarnermi AWG-mut anngunniuunnerit pingasut ingerlanneqarput.
Ujakkaartartullu siorna Nunatsinni pissartanngorniuunnermut aasarlu rulleskinik pissartanngorniuunnermut naleqqiullugu siuariaateqarsimasut nunanut allanut unammisartut sungiusaasuat oqaluttuarpoq.
Sisimiuni anngunngiuuttoqarnerani angusat tunngavigalugit Sisorartartut Kattuffiata nukappissat sisamat niviarsiararlu ataaseq AWG2016-imut peqataasussatut toqqarpai.
Nviarsissallu allat pingasut Nunatta AWG-mi peqataatitassaanut ilaasinnaassagunik angusarnerussasut, Øystein Slettemark isumalluarpalulluni oqarpoq.
Peqataasussatut toqqarneqartut:
Nukappissat:
Aka Olsen, Sisimiut, ujakkaartartoq, 1998-1999
Minik Nikodemussen, Maniitsoq, ujakkaartartoq, 2000-2001
Peter Johansen, Aasiaat, ujakkaartartoq, 2000-2001
Bjarne Hansen, Sisimiut, ujakkaartartoq, 2000-2001
Niviarsiarartaat:
Anne Mette Noahsen, Sisimiut, ujakkaartartoq, 2000-2001