Ujakkaarluni unammineq unitsiinnarpaat
Aaqqissueqataasoq Jens Berthelsen aperaarput qanoq ililluni tamanna pisimanersoq.
- Katuap eqqaani pisussaq 1 kilometerimut sprinti-mut ingerlanissaq unitsiinnartariaqarsimavarput, pissutigalugu Ukaliusap eqqaani pisussamut apummik ilusilersuinissamut atatillugu aput piiarsimammassuk. Aputaajaanerminnilu ujaraaqqat apummut akuliussimammassigit sisoraatinut innarliisinnaalersillugit. Suna tamarmi piariikannereeraluartoq piffissaq kingullerpaaq atorlugu allatut ajornartumik Katuap eqqaaniit aallarnissaq unitsinneqartariaqarsimavoq, unammisartut sisoraataasa akisoqisut aserunnginnissaat pinngitsoortinniarlugu, Jens Berthelsen oqarpoq.
Taanna erseqqissaavoq taamatut pisoqariasaarnera ingammik aaqqissuisunut pakatsinarsimasoq.
- Silamili unammisartuugaanni tamakku naammagiinnartariaqarnartarput, tassami silap allanngoriartaartarnera silami unammisartunut nutaajuneq ajormat taama pisoqartarnera ilimagikannereerneqartarmat ingerlaqqinniaannartariaqarsimavugut, Jens Berthelsen oqarpoq.
Taama oqarpoq ujakkaarnermik unamminermi aaqqissueqataasoq Jens Berthelsen.
Taassuma aamma oqaatigaa ajugaaniutivinnerit aqqaneq-marluk uani pineqartut.
Arnani Nuummeersoq Johanne Mikkelsen ajugaavoq, angutinilu Aasiannneersoq Kristian Kristoffersen ajugaalluni.