Ujakkaarluni U-23 VM-ertoqarnera Nunatsinnit peqataaffigineqarpoq

Nittaallunilu 0 gradit missaannik nillernera pissutigalugu peqataasut ilungersortitaalaavissimapput. Aammattaaq ingerlaarfigisaat arlalinnik sivingasuunik qummukajaaqarnera pissutigalug imaannaanngitsuusimavoq.

Ingerlaarfiulli løjpeliornera pitsaalluinnarsimavoq, nittaakkaluartormi kigaallannartumik sisoraatinillu pujassaanissamik ilungersunartitsisinnaasumik appussaasimanngimmata.

Karl-Peter normu 4-raalluni aallarpoq, silalu eqqarsaatigissagaanni ingerlalluarpoq, peqataasunillu 82-iusunit normu 76-iulluni apuuppoq. Karl-Peter Kristensenip tamanna 171-inik FIS-pointinnassutigaa.

Karl-Peter apuuteqqammerluni oqaatigaa kaajallannini siulliit marluk ingerlalluartut naggammilli kaajallaaniarnermini piffissamik atuivallaarsimalluni. Ataatsimulli isigalugu angusani pakatsissutigilaarpaa, ajunngitsortaali ineriartoqqinnissaminut atorsinnaanerarlugit.

U-23 VM-ertoqarnerani unamminissap tullia arfininngorpat pissaaq, tassanilu km-inut 30-inut sukkaniuteqataassaaq sisoraatinik taarsiinertalimmik. Km-it siulliit 15-it klassiskimik ingerlanneqassapput sisoraatillu taarsereerpata km-it 15-it aamma ingerlanneqassallutik. Unamminissaq aqagu nal. 07.30 Eurosportikkut aallakaatinneqassaaq.