Ujakkaarluni pissartanngorniuunnerit ullumikkut aallartipput
Qaqortumi siullermeerluni ujakkaarnermik unammersuartitsisoqarpoq, aaqqissuisulli isumalluaqaat.
Naak ajunngiivissumik piareersaatit ingerlasimagaluartut unammiuaartitsinermi aqutsisup Simon Simonsenip oqaatigaa ajornartorsiuteqalaarsimallutik.
- Ajornartorsiuteqalaarpugut nalunaaqutarsuaq tikinnikoq taassumallu qarasaasiakkut normunik agguaassinerat ajornartorsiutaalaarpoq. Kisiat tassa maannakkut piariiliivipput normussatik tigoorarpaat kingusinaalaaraluarlutik. Naatsorsuutigaarpullu qulinut unammersuaarnerit aallartissasut, Simon Simonsen oqarpoq.
Unammersuaarneq kujataani siullermeerpoq, Simon Simonsen-ilu tamanna pillugu isumalluarpoq.
- Taamaammat misilittakkagut suli annikilaaraluarput, kisianni oqarsinnaavungunarpugut silamik iluatsitseqaagut taamaammat ulluni tulliuttuni aamma silassaq ajorpasinnginnami anorikilluni pisussaangami. Nuannerunartorujuuvoq unamminissaat taamaammat neriuppugut aamma iluatsissallugu.
Unammersuaarnermi 143-ut peqataassapput, unammiuaartitsinermilu siulittaasoq unammersuaarnermut isumalluarpoq.
- Soorunami aaqqissuisuninngaanniit kissaatigeqaarput maannakkut aqqutiliarineqartartut ukua qamuteralannik angalasunit aammalu inuinnarnik pisuinnartunik aqqutiginaveersaarneqarnissaat taamaalilluta neriuutigaarput allannguttaalillugit ingerlaarfigineqarnissaat pitsaasuunissaallu taanna qulakkeernissaa.
- Kisianni qularinngilara sila taamaaginnassappat maani unammersuarneq iluatsilluartumik naammassineqassasoq, Simon Simonsen oqarpoq.
Maannamut suli unammigiat 11-it Sisimiuninngaanneersut tikissimanngillat, silap ajornera pissutaalluni. Ullumilu tikissasut aaqqissuisut oqaatigaat.
Unammersuaarneq ataasinngorpat martsip 30-iani naammassissaaq.
Frederik Lund-ip Simon Simonsen Qaqortumeersoq oqaloqatigaa,