Ujajaasimasut inuusuttut qulit Qaqortumi eqqartuunneqarput

Nukappissat qulit, 16-init 20-it tikillugit ukiullit, ukioq kingulleq novembarip decembarillu qaammataanni Qaqortumi, ilaatigut sakkulerlutik pisiniarfinnut angerlarsimaffinnullu tillinniartarsimasut,eqqartuunneqarnerat naammassineqaqqammerpoq.
Allattoq Nutaarsiassaqartitsivik / Nyhedsredaktionen, Simon Uldum -
apriilip 06-at 2013 10:41

Suliaq nunatsinni pinerluutigineqartartunut assingusunut sanilliullugu  aatsaat taamak pisariutigisutut unnerluussisusaatsitaasuniit naliliiffigineqarpoq.

-Angerlarsimaffinnut ujajaanerit sakkulersorluni. Taavalu saniatigut pisiniarfinni ujajaanerit arlallit ujajaariarnerillu inuusuttuarapaalussuarnit peqataaffigineqartut. Aatsaat taamak annertutigisumik suliaqaratta, Illersuisoq Paneeraq Andersen isumaqarpoq.

Aatsaat taamak annertutsigisumik nalaattaqarpugut eqqartuussivimmi.Sakkortunerpaammik pineqaatissinneqartoq pinerlunniaqatigiit aqutsisorisaattut isigineqartoq 20-nik ukiulik, ukiuni pingasuni qaammatinilu qulingiluani pineqaatissinneqarsimasunut inissiisarfimmiittussanngortinneqarpoq. Ukiut sisamat piumasaqaatigineqarsimagaluarput.

-Isiginiarsimavarput taasuma saniatigut piliarisimasai. Pinerlunnerni peqataanermi tunuliaquttatut, pilersaarusioqataasutut inissisimasimanera sakkortusaataavoq. Annersaanerit assigiinngitsut sakkortuut, taakkua peqqutaaqqataapput taamak annertutigisumik piumaqarsimanitsinnut, unnerluussisoq Stine Egede Nørbæk oqarpoq.

Aamma alla 19–nik ukiulik ukiuni marlunni qaammatinilu arfinilinni pineqaatissinneqarsimasunut inissiissarfimmiittussanngortinneqarpoq. Tamanna illersuisuata akerlileruminaatsippaa.

-Isumaqaratta eqqartuussisuniit uagut piumasagut, unnerluussisussaatitaasullu piumasaat tunngavilersorluarneqartut. Isumaqarougut ajunngitsumik inerneqartoq, Illersuisoq Paneeraq Andersen oqarpoq.

Sakkukinnerpaammik pineqatissineqartoq 19-inik ukiulik ukiuni marlunni pinerluttunut isumaginnittoqarfimmiit nakkutigisassanngortinneqarpoq.

Pineqatissiinnerit unnerluussisussaatitaasuniit naammagisimaarneqarput.

-Ataatsimut isigalugu naammagisimaartorujussuuarput, ataatsimut isigalugu piumasagut amerlanerpaat pivarput,unnerluussisoq Stine Egede Nørbæk oqarpoq.

Pineqaatissinneqartut nukappissat qulit tillinniartarnerit saniatigut biilinik tillinniartarsimasutut arlaleriaqalutillu  annersaasarsimanetik pillugit aamma pineqatissinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq