Ujajaaniat tallimat danskit sakkutuuinit tigusarineqarput

Umiarsuaq assartuut Hollandimiunit pigineqartoq ujajaanianit saassunniarneqarsimagaluarpoq, ujajaanialli umiarsuaaraat ikuallalermat pilersaarutit qatangiinnartinneqarput.

Nutaarsiassaqartitsivik Ritzau taama allaaserinnippoq.

Ujajaanianik tigusarinninneq pikkunavissumik pivoq. Hollandimiummi saaassunneqaleramik qulimiguulik atorlugu imminut illersorsimapput.

Qulimiguulik mianersoqqussummik igissimavoq, Hollandimiullu inuttaasa ajunaalernermik ikumatitamik ujajaaniat tungaannut igeriussisimapput, ujajaaniat umiarsuaaraat ikuallatsilerlugu.

Ujajaaniat immamut pissittariaqarsimapput, danskillu umiarsuaataat sorsuut Absalon annaassiniarnermut peqataasariaqarsimalluni.

Ujajaaniat tigusarineqareermata umiarsuaaraataat Absalonimit kivisinneqarpoq:

- Ujajaaniat Absalonimiitsinneqarput, qanorlu pineqassanersut nalunarallarluni, Jesper Lynge, Sakkutuut imarsiortut qullersaqarfianneersoq Ritzauimut oqarpoq.

Ujajaaniat inatsisitigut malersorneqarsinnaanissaat eqqarsaatersuutigineqarpoq, sumili taamaaliortoqassanersoq aamma nalornissutigineqarluni. Hollandimiulli umiarsuaataannik saassusseriaraluarmata Hollandimi eqqartuunneqarsinnaanissaat ilimagineqarpoq.