Ujaasinerit marluk ingerlanneqarput

aggustip 28-at 2006 16:18

Tasiilami Narsamilu politiit, sapaatip akunnerata naanerani ujaasinerit ulapputigisimavaat.

Takornariaq Amerikamioq singerniiarsimasoq Tasiilami ujaarineqarsimavoq, Narsamilu danskeq qangarnisarsiooq ujaarineqarsimalluni.

Takornariat qatanngutigiit marluk Amerikameersut Tasiilami pinngortitami pisuttuartillutik aappaa tutinerliorluni arfininngormat singerniiarpoq, taama Tasiilami stationslederi Kristian Síngertât oqaluttuarpoq. Taamatut pisoqariarmat singerniiartup angajua ikiortissarsiorluni ingerlasimavoq.

Takornariaq ikiortissarsiortoq arfininngormat unnukkut Tasiilamut apuussimavoq, taarpallaalereersimammalli, sapaammi ullaakkut ujaasineq aatsaat aallartinneqarsinnaasimavoq.

Ujaasineq aallartinneqarmat, ajornartorsiuleraluarsimapput, singerniiartoq utaqqikatalerluni, nammineerluni sumiffigisaminit ingerlasimammat.

Ujaasineq ilimagisamit sivisunerusumik ingerlanneqarsimavoq, ujaarineqartorli ajunngitsoq nassaarineqartoq stationslederi oqarpoq.

Narsami tammaaneqartoq tassaavoq danskeq qangarnisarsiooq 51-inik ukiulik. Taanna arfininngormat Tunulliarfiliarsimavoq, putsilermallu sumiissusersineq ajulersimalluni.

Qangarnisarsiooq marlunnik ilaqarluni qallunaatsiaqarfikut alakkarsimavai, kingusinnerusukkulli ilanilu naapissallutik isumaqatigiissimapput, avissaarallarsimallutillu.

Qangarnisarsiuup naapeqqiffissamut takkutinngimmat, ujaasineq aallartinneqarpoq, aatsaalli sapaatiummat ajunngitsoq nassaarineqartoq, Narsami stationslederi Ib Lennert Olsen oqarpoq.

Ujaasinerit tamarmik qulimiguulik atorlugu ingerlanneqarput.