Ujaasineq pillugu ullaaq manna aalajangiisoqassaaq

Umiatsiamik Saqqap Ilulissallu akornanni marlunngormat unnukkut umiusumik taassumalu aquttuanik politiit annaassiniarnermillu suliaqartut ujaasinertik ippassaq nangippaat, aquttuanillu ujaasinermut atatillugu qanoq iliuuseqaqqittoqassanersoq ullumi ullaap tungaani aalajangiisoqarumaarpoq.
Allattoq Jaaku Lyberth
aggustip 29-at 2014 07:25

- Umiatsiaq taassumalu aquttua nassaarinngilagut, politimesterip tullersortaa Morten Nielsen KNR-imut oqarpoq.

Politiit annaassiniarnermillu suliaqartut sisamanngornermi ujaasinerminni politiit qimmiannik nassataqarput qallunaat nuliariit marluk ajunaarsimasut pingasunngormat nassaarineqarfiat missisuiffigineqarluni.

- Tamaani aamma paasissutissanik nutaanik pissarsinngilagut Morten Nielsen oqarpoq.

- Ujaasinermut atatillugu qanoq iliuuseqaqqittoqassanersoq politiit ullaarmanna tallimanngornermi aalajangissavaat.

Umiatsiamik aquttup Ilulissaninngaaneersup maanna ujaarineqartup saniatigut nuliariit ajunaartut aappaat - Ilulissani ilisarisimaneqarluarput, aviisi Fredericia Dagblad taama allaaserisaqarpoq.

70-nik ukiulik Inger Davidsen, Socialdemokraatit sinnerlugit Fredericiami kommunalbestyrelsemi ukiorpassuarni ilaasortaavoq.

Uini Ole Davidsen suleqatigalugu atuartut Ilulissaneersut Ilulissat illoqarfittut ikinngutaanut Fredericiamut ukiut tamaasa tikeraartarnissaannut suliniuteqartarput.

Nuliariit Fredericiameersut ikinngutaat aappariit  utoqqasaat Aarhusimeersut umiatsiaq marlunngormat umiummat aamma ajunaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq