Ujaasineq: Nuup Kangerluanit mayday-imik kalerrisaarisoqartoq
Nuuk Kangerluanit mayday-imik kalerrisaarisoqareernerani ujaasisoqalerpoq.
Issittumi Sakkutooqarfiup alapernaarsuutaa, Lauge Koch ujaasiartorluni Nuup Kangerluanukarpoq.
Allattoq Malik Brøns
maajip 06-at 2020 10:14
Nuup Kangerluanit Aasiaat Radioatigut VHF-kanal 16-ikkut mayday-imik marlunngornermi unnukkut kalerriisoqarpoq.
Tamanna pissutigalugu Issittumi Sakkutooqarfiup alapernaarsuutaa, Lauge Koch sumiiffimmukarpoq. Politiit angallataat annaassiniarnermilu qulimiguulik, S-61 aamma ornigupput.
Illersornissaqarfik ullormut nalunaarusiaminni taama allaaserisaqarpoq.
Mayday-imilli nalunaaruteqarnermi sumiiffik oqaatigineqanngilaq. Taamaammat sumiiffimmi isorartusumi ujaasingaatsiartoqarpoq.
Ullormut nalunaarusiaq naapertorlugu Issittumi Sakkutooqarfik pingasunngornerup unnuaanut ujaasivoq.
Politiit pingasunngornermi ullaap-tungaani annerusumik paasissutissiiniarlutik KNR-imut paasissutissiissutigaat.
