Ujaasineq: Mayday, mayday, kivilerpunga

Aasiaat Radioata VHF-ikkut kalerriisoqarnera pissutigalugu politiit marlunngornermi nalunaaqutaq 17.23 nalunaaruteqarfigineqarput.

- Mayday, mayday kivilerpunga, politiit tusagassiuutinut nalunaarummi allapput.

Politiit oqarnerat naapertorlugu kalerriineq Nuup avannaata kangianit kalerriineruvoq.

- Ajunaalernermi kalerrisaarineq Nuup avannaata kangiani napparummi Qingaaq 16-imeersuuvoq, politiilli kalerrisaarisup sumiiffia pillugu paasissutissaateqanngillat, inunnilluunniit maqaasineqartunik nalunaarutiginnittoqarneranik paasissutissaateqaratik.

Taamaammat politiit inummik ujaasinermik aallartitsipput. Issittumi Sakkutooqarfiup timmisartua qulimiguulillu seahawk atorlugit aamma ujaaseqataapput.

AAMMA ATUARUK Ujaasineq: Nuup Kangerluanit mayday-imik kalerrisaarisoqartoq

Pingasunngornerup unnuaanut ujaasineq ingerlanneqarpoq, ullumikkullu Air Greenlandimit qulimiguullik, S-61 AS-350-ilu atorlugit aamma ujaasisoqarluni.

- Politiit angallamminnik Nuup Kangerluani inummik ujaasipput, mayday-imillu kalerriisaarisoqarnera taamaallaat paasissutissaatigaarput, taamaattumik politiit innuttaasunit ikioqqupput, politiit allapput, nangillutillu:

- Nuup Kangerluanut ippassaq angalasumik sulilu angerlarsimanngitsumik nalunngisaqarpit? Imaluunniit mayday-imik kaleriivit kingornalu Aasiaat Radioanut attaveqarnak?

Nuummi politiit oqarasuaammut 70 14 48-mut attavigineqarsinnaapput.