Uippalliasuuneq inuup sananeqaataanit aallaaveqarpoq

Inuit uippallerujussuarnermik misigisartut inunnut peqqissunut naleqqiullugit inuup sananeqaataatigut allaanerussuteqartuusut ilisimatuussutsikkut misissuinerup nutaap ersersippaa.
Allattoq Louise M. Kleemann
apriilip 03-at 2008 08:04

Uippallerujussuartarneq inuppassuarnit atugaasaqimmat Danmarkimi universitetimi ilisimatuunit misissuivigineqarpoq inuit 13-t misissuinermi atorneqarlutik.

- Inuit ilaat uippallianerusarput ilaallu taamaattaratik. Uippalliasuunerlu inuup sananeqaataanit aallaaveqartuuvoq kingornunneqarsinnaasoq, Odensep napparsimaviani ilisimatooq Torben A. Kruse nutaarsiassaqartitsivimmi ritzauimi taama issuarneqarpoq.

Uippallertarnerup kingornuttagaanerata misissuivigineqarnerani Savalimmiuni napparsimavik suleqatigalugu inuit Savalimmiuneersut aallaavigalugit misissuineq ingerlanneqarpoq. Taavani inuit qeqertami najugaqarnertik pissutigalugu sananeqaatimikkut assigiiaarnerarneqartarmata.

Paasineqarsimavorlu inuup kingornuttagaa sananeqaat aalajangersimasoq uippalliasuunermut peqqutaaqataasartoq.

Kinguaariippassuit misissuinermi atorpavut, paasisamullu toorninguatut ittoq paasititsisuusoq erseqqissaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq