Uini toquppaa

Iranimi arnap uimi unataannarmani akiniarlugu toqussimavaa. Arnaq marlunnik meeralik nammineq ullaaq pillagaalluni toqutaavoq. Nunat tamat Teheranimi naalakkersuisunik avoqqaarliigaluarnerat soqutigineqanngitsutut ippoq, jp.dk-mi allapput.
Allattoq Mads Lynge
januaarip 02-at 2008 16:56

Rahele Zamanip sivisuumik persuttarneqartarsimanini qatsullugu paasisat malillugit uini toquppaa.

Arnaq 27-nik ukiulik ullaaq Teheranimi paarnaarussivimmi Evinimiittumi qiminneqartoq Inuit pisinnaatitaaffii pillugit kattuffik Iran Human Rights nalunaarpoq.

Taamaalillutik nukappiaqqap pingasunik ukiullip niviarsiaqqallu tallimanik ukiullip angajoqqaaverunnerat nunanit tamanit avoqqaarineqarpoq.

Norgemi naalakkersuisut pisimasoq pillugu qisuariapallapput: ”Meeqqat taakku marluk angajoqqaaqaratik maanna alliartornissaat amiilaarnarpoq. Naakkitsaatsuliorneq pillugu Iranip aallartitaa saaffigissavarput”, Norgemiut nunanut allanut ministereqarfiani allatsi, Raymond Johansen Aftenposten.no-mut oqarpoq.

Pisut sunit tamanit maluginiarneqarnerujussuat pissutigalugu toqumut pillaanissaq sapaatip akunnerini pingasuni kinguartinneqarsimavoq. Rahele Zamani meeqqat pillugit sakiminut isumakkeerfigequlluni allagaqarsimagaluarpoq.

”Ulloq manna tikillugu qanoq iliorsimanera paasisinnaanngilara, soorlumi sinnattuinnarsimasunga. Imami sivisutigisumik persuttagaallunga naalliutsitaasimavunga allaat imminut aqussinnaajunnaarsimallunga. Uangali aamma ilukkut aalassassimaqaanga” Rahele Zamani ilaatigut asassuunneqarnissaminut qinnuteqaammini, iranimiut aviisianni Etemadimi saqqummiunneqartumi ilaatigut allappoq.

Rahele Zamanip toqutaanissani kinguartinneqaqqullugu qinnuteqarsimagaluarpoq, sakiminit isumakkeerfigineqarnissani neriuutigigaluarlugu. Iranimi toqumut pillaanissat kinguartinneqakkajupput akuttunngitsutigullu ilaqutaasut aningaasanik ima katersisimatigisarlutik toqutassanngortitaasoq akiliillutik annaassinnaanngortarlugu.

Norgemiillu avoqqaarliineq taava sumut iluaqutaavamita? ”Isumaqassanngilagut nunarujussuaq Iran sunnersinnaassallutigu, nunalli iluani toqumut pillaasarnermut akerliullutik suliniuteqartunut avoqqaarlliinerput pingaartorujussuuvoq”, Raymond Johansen Aftenposten.no-mut oqarpoq.

Nunat tamat avoqqaarinninnerat ilaatigut nunat killiit ilaasa toqumut pillaasarnerat pissutaalluni iluaqutaasinnaasimanngilaq.

Minnerunngitsumik USA-p toqumut pillaasarnera Iranimut avoqqaarliisunut nukillaarsaasimavoq.