Uimit persuttaasartumit qimaasut

Nalunaarusiornermi qallunaatut "Væk fra Grønland"mik taaguutilimmi, 'Kalaallit Nunaanniit qimagunnermut' kalaallisuunngortinneqarsinnaasumi, kalaallit ilaqutariit 20-t sivikinnerpaamik ukiuni marlunni Danmarkimi najugaqarsimasut apersorneqarsimapput. Taakkunannga amerlasuut anaanaapput kisimiittut uiminnik persuttarneqartarnertik pissutigalugu Danmarkimut nuussimasut.

Apersorneqartut ilaat amerlasuut Danmarkimi inunnut allanut attaveqarpianngillat ajornartorsiuteqaramik taamaammat Nunatsinniinnerminniit Danmarkimut pinerminni kiserliornerunerarput. Taamaakkaluartoq apersorneqartut tamarmik Kalaallit Nunaanni inuunerisinnaasaminniit pitsaanerusumik Danmarkimi inuuneqarnerarput.

Meerartaat pitsaanerusumik ilinniartitaasinnaapput ajornartorsiuteqartillutillu ikiorserneqarsinnaasarlutik. Taamaattumik ilaqutariit apersorneqartut Kalaallit Nunaannut uternissartik pilersaarutiginngilaat.

Ilaqutariilli amerlanersaat inuuniarnerminni atugassarititaasutigut ajornartorsiuteqartutut taasariaqarput, piitsoqarfinni najugaqarlutik ilaqutariinnilu 20-ni taakkunani inersimasortaasut sisamat kisimik sulinermik inuussutissarsiuteqarput.

- Ilaqutariit Danmarkimiinnertik nuannarineraraluarlugu ikiorneqarsinnaajunnaarsimasutut oqaatigineqarsinnaangajapput. Tassami ikiuutisisinnaanerat killeqalerpat ilaasa annertuumik atugarliulernissaat aarleqqutigisariaqarpoq, nalunaarusiamut akisussaasuusoq Else Christensen oqarpoq.