Uiloq Slettemark nunatsinnit VM-imut peqataasuni angusarissaarnerpaavoq

Sisorarluni ooqattaasartartoq Uiloq Slettemark ukioqqortusilaareeraluarluni motionistinullu nooreeraluarluni Korea Kujallermi illoqarfimmi Pyeongchang-imi nunarsuarmi pissartanngorniunnermi angusarissaarpoq.
Allattoq Najaaraq Egede
februaarip 15-at 2009 13:31

Uiloq Slettemark ingerlallualaavissimavoq sisorarluni ooqattaasarnermini nikorfalluni tallimat tamakkerpai, taamaalillunilu sisoraatinik arpaqataasuni peqataasut 108-t akornanni nr. 88-iulluni.

- Angusara ajunngeqaaq, Sverigemeersoq Amerikameersorlu uannit kingulliupput. Isumaqalersimagaluarpungami sidstikunut ilaassallunga, ukiormi affaq kingulleq sungiusarpiarnikuunngilanga, taamaammat OL-imut aappaagu ingerlanneqartussamut anngunnikuunera eqqaallugu tamaviaangaassaanga, Uiloq Slettemark oqarpoq.

Uiloq Slettemarkip uia Øystein Slettemark unammeqataanermini angusarissaarpallaanngilaq, tassami aallartittut 123-usut akornanni nr. 104-voq.

- Aatsaat taama ajortigisumik VM-imut peqataasaleramali angusaqarpunga, pakatseqaanga, Øystein Slettemark oqarpoq.

Nukarlerni sisorarluni ooqattaasartartoq Kristian Kristoffersen ulloq siulleq unammeqataanermini nr. 109-nngorpoq.

Angusarissaarnissaanik ilimagisaq Miillaaraq Lennert Korea Kujallermeeqataagaluarluni bihulimigut aseruuttooqqalluni ullumi unammeqataanngitsoorpoq, soorlu aamma qanittukkut Canadami ingerlanneqartuni nukarliit nunarsuarmi pissartanngorniunneranni peqqiilliornini pillugu angusarissaarpallaanngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq