Uiloq

Shakespeare-ilu sammigallartillugu uumasut silarsuaannut pulalaariarta. Ilami uiloq Shakespearep nalaaneersoq sulilu uumasoq Islandip avannamut sineriaaniittoq immamit qaluneqarsimavoq.
Allattoq Karsten Sommer
novembarip 03-at 2007 13:36

Shakespeare-ilu sammigallartillugu uumasut silarsuaannut pulalaariarta.

Ilami uiloq Shakespearep nalaaneersoq sulilu uumasoq Islandip avannamut sineriaaniittoq immamit qaluneqarsimavoq.

Uiloq ukiunik 405-inik utoqqaassuseqassangatinneqartoq ilisimatuunit Bangorip ilisimatusarfianeersunit siumorneqarsimavoq. Bangor University Tuluit Nunaanniippoq.

Silap pissusaata allanngoriartorneranut tunngatillugu ilisimatuut misissuipput, tassungalu atatillugu uumasunik misissuillutik. Uiloq pineqartoq 80 meteritut itissisulimmit qaqinneqarsimavoq, uumassusillillu utoqqaanersaattut maanna nalilerneqarluni.

Uiloq aamma Islandip imartaaneersoq pisortatiguunngikkaluamik uumassusilinnit utoqqaanersatut nalilerneqartarsimagaluarpoq, ukiunik 374-inik utoqqaassuseqassangatinneqarami.