Uillut avannamut ingerlaalersinnaanerat aarleqqutigineqarpoq

Silap pissusaata allanngoriartornerata kingunerisaanik Qalasersuup nalaa sikuissappat, taava uillut assigiinngitsut Manerassuarmi siumorneqarsinnaasut Atlantikup avannaanut ingerlaalersinnaanissaat aarleqqutigineqalerpoq.
Allattoq Louise M. Kleemann
aggustip 11-at 2008 08:34

Taamaalisoqassappat pinngortitami pissuseqatigiinneq eqqorneqarsinnaassaaq. Taama ilisimatuut marluk aviisimut The San Francisco Chronicle-imut oqarput.

Uillut assigiinngitsut Manerassuarmiit Atlantikup avannaanut kingullermik ingerlaarmata, ukiut 3,5 millionit matuma siornatigut tamanna pisimavoq, Tassalu taamanikkut nunarsuatta silaa kiatsiimigaluarpoq.

Naalagaaffiit Peqatigiit silap pissusia pillugu ataatsimiittartoqatigiivisa nalilersuinerat naapertussagaanni silap pissusaata allanngoriartornera ullumikkutut sukkatigisumik allanngoriartuinnassappat Qalasersuup nalaa ukioq 2050-ip missaani imaassinnaavoq sikueruttoq.

Uumassusillit arlallit sumiiffimmiit sumiiffimmut ingerlaarnerat aallartereerpoq, killormoortuanilli pisoqarluni. Tassa Atlantikup avannaaniit Manerassuup tungaanut ingerlaarnerit siulliit maanna paasineqalereermata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq