Uiarterinerit nunatsinni takinersaat
Timmisartukkut aqqutip taassuma ukiortaamit unitsinneqarnissaa Illoqqortoormiuni innutaasunit iluarineqanngilaq. Nerlerit inaanniit Kulusumukarniartut kitaanut aqqusaaqqaartalissapput. Illuanillu Kulusumiit Nerlerit inaannut angalaneq taamatut inississalluni.
- Nerlerit Inaata Kulusuullu akornanni timmisartuussisarnerit Naalakkersuisunit aalajangerneqarsimasut assorujussuaq iluarineqanngilaq, Illoqqortoormiuni innutaasut ippassaani ataatsimiinneranni peqataasoq Erling Madsen taama oqaluttuarpoq.
Kuluusup Nerlerit inaatalu akornanni timmmisartuussissarneq atorluarneqarpoq.
- Aasaanerani sulinngiffeqarfiup nalaani ilaqutariit Illoqqortoormiuniittut aamma Tasiilamiittut imminnut tikeraarlutik timmisartukkut aqqut taanna qujamasuutigisorujussuuaat, Erling Madsen oqarpoq.
Timmisartukkut aqqut taanna timersortartunit aamma atorluarneqaleraluarpoq.
Illoqqortoormiuni isikkamik arsaattartut kredsmesterskabeqartoqarnerani aasaq pisumi, Tasiilamut unammiartorput, taamaattoqarnerani Tasiilami Illoqqortoormiunilu innutaasunit assut nuannaartorneqarsimasoq, Erling Madsen unnersiorpoq. Tamatuma ukiut tamaasa pisalernissaa Illoqqortoormiuni Tasiilamilu innuttaasunit neriuutigineqarsimagaluarpoq.
Kommuneqarfik Sermersuumi borgmesterip Asii Chemnitz Narup-ip timmisartukkut kiffartuussinissamut isumaqatigiissut innutaasut qulaatiinnarlugit aalajangiunneqarsimmat pissusissamisoorsorinngilaa.
- Suliamik taamak pingaaruteqartigisumi, attuumassuteqartut, kommunit allallu pingaaruteqartut tusarniaavigeqqaarnagit qulaatiinnarlugit atsiulersaartoqarmat, tamanna pissusissamisoorsorinngilara, Asii Chemniz Narup oqarpoq.
Tunumi takornarianik sullissineq siumukartoq timmisartukkut aqqutit allanngortinneqarnerisigut kinguassasoq Asii Chemnitz Narup isumaqarpoq.
-Takornarialerisut sulinerat ingerlaqqittariaqarpoq, timmisartukkut aqqutit ukiuni kingullerni atuuttut takornarianik suliaqartunut assorujussuaq iluaqutaasimapput, taamaattumillu kiffartuussinissamik isumaqatigiissut takornariaqarnermik sulialinnut kinguariarnerussaaq, Asii Chemnitz oqarpoq.
Kiffartuussinissamik isumaqatigiissut atsiorneqannginnissaa Kommuneqarfik Sermersuumi borgmesterip kaammattutigaa.
- Kiffartuussinissammik isumaqatigiissut tusarniaasoqartinnagu atsiorneqassanngitsoq iluunngarlunga kaammattuutigaara, Kommuneqarfik Sermersuumi borgmesteri Asii Chemniz Narup oqarpoq.
Nunatsinni ilaasunik, allakkanik nassiussanillu angallassineq pillugu kiffartuunneqarnissamik isumaqatigiissutit ukiortaami 2013-imi atuutilissaaq.
Kiffartuunneqarnissamik isumaqatigiissummut akerliusut qarasaasiakkut atsiornernik katersipput.
