Uggornarpoq ilinniartut pingajorarterutaat uniinnartarmata
Paamiuni Imarsiornermik Ilinniarfimmi ilinniartut aallartittut kingulliit 30-it akornanni taamaallaat aqqanillit naammassillutik allagartartaarput.
- Ilinniartitarisat aallartinneranni amerlassusaat qiviaraanni, uggornartarpoq taakku pingajorarterutaannaat allagartartaarlutik naammassisarmata.
Imarsiornermik Ilinniarfiup pisortaa, Mannarsinnguaq Noahsen taamaalilluni meeqqat atuarfiannit naammassisut piginnaasaasa appasippallaartarnerinut isornartorsiuisunut ilannguppoq, isumaqarlunilu meeqqat atuarfiannit naammassisut piginnaasaat qaffasinnerusariaqalersoq.
- Meeqqat atuarfiat pisuutinniaannanngikkaluarlugu, tassani pisussaaffiliinerit sakkukippallaarsorinarput, maani Imarsiornermik Ilinniarfimmi atuartut piginnaasaannaalluunniit eqqarsaatigigaanni.
Paamiuni Imasrsiornermik Ilinniarfiup pisortaa, Mannarsinnguaq Noahsen taama oqarpoq.
Aamma Sisimiuni Sanaartornermik Ilinniarfimmi, HTX-ip aamma GU-p pisortaata oqaatigaa, tassani aallartittartut atuagarsornikkut piginnaasaasa annikippallaartarnerisa pilersittaraa piffissamik atuinerujussuaq. Pisortaq Jokum Møller ima oqarpoq.
- Oqartariaqarpunga maani ilinniartut ilaasa piginnaanikinnerisa kingunerisarmassuk nukinnik annertuupilussuarnik atuisariaqartaratta, tassa oqalottariarsornerinnaanngitsunut aammali kisitsinermut, taamaattumik maanna apeqquserneqartariaqalerpoq, meeqqat atuarfiinit naammassillutik qaffasinnerusumut ilinniagaqalerniarlutik aallartittartut ilaasa piginnaanikinneri eqqarsaatigalugit tamakku qaffasinnerusunut ilinniaqqinnissamut ilumut piareersimanersut.
Sanaartornermik Ilinniarfimmi pisortaq, Jokum Møller taama isumaqarpoq.
Qaffasinnerusumik ilinniarfiit tallimaat Radioaviisimit oqaloqatigisatta tamarluinnarmik oqaatigaat, ilinniakkanut qaffaasinnerusunut aallartinniarnermi piumasaqaataasut, ilinnialersut amerlavallaat naammattumik piginnaasaqarfigineq ajoraat. Qaffasinnerusumik ilinniarfiit oqaloqatigisagut tassaapput Saviminilerinermik Ilinniarfik Nuummiittoq, Ilinniarnertuunngorniarfik GU Nuuk, Niuernermik Ilinniarfik Nuuk aamma Paamiuni Imarsiornermik Ilinniarfik kiisalu Sisimiuni HTX aamma GU.
Meeqqat atuarfiannit naammassinermi pitsaanerusumik angusaqarluni ingerlaqqinniarnermi piumasaqaataasunut suut aaqqiissutaasinnaasut oqaloqatigisatsinnit aaqqiissutissamik siunnersuuteqartoqanngilaq, Sisimiunili Sanaartornermut Ilinniarfimmi pisortaq isumaqarpoq, isumaliutigineqaqqittariaqalersoq ilinniakkanut qaffasinnerusunut ingerlaqqinniarnermi piumasaqaataasut nalilersoqqinneqarnissaat.
- Meeqqat atuarfiannit qaffasinnerusumut ingerlaqqinniarnermi piumasaqaataasoq, eqqaamasara naapertorlugu D-uvoq. Taassuma appasippallaarnera eqqarsaatigineqartariaqarpoq gymnasiamut ilinniarnermut naleqqussarlugu.
Sisimiuni Sanaartornermi Ilinniarfimmi aamma GU-mi pisortaq, Jokum Møller taama oqarpoq.
Radioaviisimit oqaloqatiginiarsimagaluarparput Ilinniartitaanermut Naalakkesuisoq, Nick Nielsen, Siumut, aperalutigu qanoq iliuuseqartoqarsinnaaneranik. Taannali angalalluni pissarsiassaanngimmat oqaaseqartissinnaasimanngilarput.
