Ugandami qimaasunut inissiat piiarniarpaat
Timimikkulli innarluutilinnut 50.000-inut ukiorpassuarni qimaasunut inissiivimmit allamut nuuffissaqanngitsunut namminnerlu illuliorsinnaanngitsunut tamanna aarleqqutigineqalerpoq. Illuliorsinnaasummi kisimik Ugandami ikiorsiiffigineqarsinnaallutik siunissaqarput.
Taleqanngitsut kaagitussanngillat, taamatut qallunaat qanganit oqariaaseqarput. Mannakkulli Ugandami oqartoqarsinnaassaaq; taleqanngitsut siunissaqanngillat. Marsip 31-anni qimaasut najugaqarfii nivattaassuarnit piiarneqassasut nalunaarutigineqarpoq. Maannakkut tamaannga nerisassanik nakorsaatissanillu aattuisarneq aamma unitsinneqassaaq. Qimaasulli najugaqarfiiniipput inuit tuusintillit taleqanngitsut nioqanngitsullu. Danmarkimi innarluutillit Ugandami alapernaarsuititaat, Bent Kokhauge, oqarpoq pilersaarutit unitsinneqanngippata tamanna innarluutilippassuit inissaarullutillu annaffissaarunnissaannik kinguneqassasoq. Sorsunnerimmi kingunerinik taleqangitsut nioqanngitsut, assaqanngitsut isigaqanngitsullu saniatigut aamma tappiitsut tarnimikkullu nappaatillit amerlasoorpassuupput. Qimaasulli najugaqarfiiniit nuunniaraanni ikiorserneqarlunilu, taava angerlarsimaffissap iigai qarmariarlugit assilillugit pisortanut takutittariaqarput, taamaaliortut pisortanit taava qaliassaminnik tunineqartarput. Piffissarlu imaalereersoq pisortat ikiuiniaqatigiiffinneersulluunniit innarluutillit namminneq nuussinnaanatillu illuliorsinnaanngitsut qanoq iliuuseqarfigineqassanersut suli oqaatiginngilaat.
Ugandap avannarpasinnerusortaani siornatigut ukiorpassuarni pikitsitsisoqarfiusuni maanna ukiuni marlunngortuni perulluliortoqassaalermat, tamaani qimaasut najugaqarfii naalakkersuisunit matuniarneqarput.
