UFOnut tunngasunik isertugaatit ammaanneqarput
Sisamanik teqeqqulik saattukujooq ikumasoq nipeqanngitsumik timmilluni Pituffimmi sakkutooqarfimmik qulaassivoq. Nunamiit isiginnaartuuvoq maskiinalerisoq qallunaaq 56-inik ukiulik, aviisimut Urbanimut oqarnera najoqqutaralugu, inuunermini aatsaat taamak tupinnartigisumik 1981-imi takusaqartoq.
Nalunaaqutaq ullukkut ataatsinut tanneq qulinngorpoq. Piffissami tassanerpiaq issimaffigisaata ungasinngisaani Amerikamiut sakkutooqarfiannit timmisumik suunera paasineqanngitsumik isiginnaartoqarpoq – taamaattoq nalinginnaasumik UFO-mik taaneqartarpoq.
Sakkutuut timmisartortartut ukiuni 50-ini kingullerni UFO-nut tunngasunik 15.000-eriarlutik nalunaarfigineqarsimapput.
Oqaluttuat taamaattut allarpassuillu sakkutuut timmisartortartut UFO-nut paasissutissanik toqqorsivianni ammaaffigineqaqqammersumi atuarneqarsinnaapput. Kisianni tamakkuninnga paasiniaaqqissaartartunik soqanngimmat, saaffiginnissutit UFO-nut tunngasut inuiaqatigiinnut navianartorsiortitsinngikkaangata toqquinnarneqartarput.