UFO-natik naneruarferujussuupput

Ulloqeqqaanerani radioaviseqarnitta kinguninngua aaqqissuisoqarfitsinnut inuit arlallit saaffiginnipput, taakku qilammi qaamasorsuit aappalungusingajattut suunerinik eqqoriaallutik.

Ataaseq SAS-ip timmisartuinik marlunnik isiginnissimaneraasoq, alla allarluinnarmik nassuiaatissaqarpoq.

Taanna Svend Christensen Nuummeersoq nassuiaatissaqarpoq uppernarluartumik.

- Panipput tallimanngormat 21-inik ukioqalerpoq, inuuialu nalliussiniarlugu naneruarfiusarujussuarnik Thailandimi pisiarinikuusatsinnik qummut aallartitsivugut, aallartippoq.

Naneruarfissuit taakku qaqorteqqasut naasui atorlugit sanaajupput, ukioq Thailandimiinnerminni pisiaat.

- Thailandimi ileqquuvoq, assersuutigalugu ilaquttamik annaasaqarsimasut inuulluaqqussutigalugu ikumatitamik qummut qullartitsisarnerat. Assut kusagigatsigit uagut maani aamma misilikkusussimavarput, taamaalillutalu qullartitsilluta. Naneruarfiusarujussuaq imusaasamik ikittarfeqarpoq. Uulia ikikkaanni silaannaq oqitsunnguaq pilersinneqartarpoq taamaalillunilu naneruarfiusarujussuaq taanna qangattariartuaalersarluni, Svend Christensen nassuiaavoq.

Taamaammat-una tallimanngormat unnukkut anoraasammat naneruarferujussuaq taanna qullangaatsiartoq, taamaalillunilu ungasianiit allaat isiginnaarneqarsinnaasimalluni.

Svend Christensen ilisimatitsivoq suli naneruarfiusarujussuarnik peqaramik ilimanarsinnaasoq ulloq alla aamma Nuup qilaani UFO-sorisinnaasanik takusoqarsinnaasoq.

Nittartakkatsinni knr.gl-imi naneruarferujussuup suli ikinneqarani assinga takusinnaavat.