Uersakkatut peroriartorneq nipangiutiinnarumanngilaa

"Uersagaanermik" akerartuutit Anne Sofie Hardenbergip, anaanamini kalaaliusumi Qaqortumi peroriartornermini ulluinnarsiutigai. Angunni qallunaajusoq Danmarkimi najugalik nalullugu Anne Sofia peroriartorpoq.

Ataataqarnani peroriartorneq annernartoq, maanna "Ataatamik ilungersuutit"-nik atserlugu Anne Sofie Hardenbergip atuakkiatut saqqummersippaa.

Atuakkiaa tunngavigalugu kalaallimik anaanaqarluni nalusamillu qallunaamik ataataqarluni peroriartorneq KNR-imi sapaatip-akunnerani tulliuttumi sammissavarput.

Sammisarput taaguuserparput: Ataataga kinaava?

Anne Sofie Hardenberg nerisassiorneq pillugu atuakkiortutut ilisimaneqarnerugunarpoq, nunatsinnilu ikittuinnaat ilisimagunarpaat ataataqarani meeraasimasoq.

- Imaannaasimanngilaq pereersimasut qaqqillugit kikkunnut tamanut atuagassianngorlugit, misigissutsit sakkortuut atuakkap aaqqissornerani uannut aamma atugaaqqissimapput, Tussunngoqaluni Anne Sofie Hardenberg oqarpoq.

Nunatsinni 1950-60-ikkunni sanaartorneqaleruttornerani qallunaat tikittartut amerlaqaat, ilaallu taamanikkut oqartarneq malillugu "uersaannittarsimapput". Taamaalillutik aamma meerarpassuit ataatartik kinaasoq ilisimanagu taama alliartorput. Akerartugaaneq Anne Sofie Hardenbergip misigisarsimaqaa.

- Atuagaq uannuinnaq tunngavinngilaq, tassami uersagarpassuarnut assigiinngitsorpassuarnik misigisaqarnikuusunut tunngatillugu atuagaq allassimavara, neriuppungalu aamma oqallinnermik imaluunniit ingerlariaqqinnermik aamma inuppassuarnut pilersitsiumaartoq, nangippoq.

Anne Sofie Hardenberg Qaqortumi 1948-mi inunngorpoq arni ningiunilu peroriartorfigalugit. 17-inik ukioqarluni ataatani danskiusoq ujalerpaa nassaaralugulumi. Angutaata Kalaallit Nunaanni paneqarnini ilisimajuaannarsimagamiuk panni tikilluaqqugaa nuliata akuerinngilaa.

Atuakkami Anne Sofie Hardenbergip ataataminut, atsaminut, aqqalusssaminullu allakkatigut attaveqartarneri atuarneqarsinnaasut ilagaat, nunatta oqaluttuassartaanullusooq ilaasut.

- Allakkat annertoorujussuarmik kalaallit inuiaqatigiit taamanikkut inuunerannik oqaluttuartuupput, soorunami aamma kalaallit qallunaallu inuiaqatigiit oqaluttuarisaanerannut ilaalluinnartut - uersagaasugut taamani meeranitsinni qanoq aamma atugassaqartitaasimasugut pillugu, Anne Sofie Hardenberg oqaluttuarpoq.

Anne Sofie Hardenbergip ataataqarani peroriartornermini aqqusaartagai artornartut pillugit radioavisimi aqagu ulloqeqqanut ilanngutassiaqassaagut.

Nittartakkatsinni knr.gl-imi sammisaq "Ataataga kinaava?" nammineq misigisanik allaffigineqarsinnaavoq.

Atuagaq ”Ataatamik ilungersuutit” Anne Sofie Hardenbergip Pia Christensen Bangillu allagaat kalaallisut qallunaatullu Milik Publishingimit saqqummersinneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat