"Uersakkat" pisinnaatitaaffeqalerumallutik Nuummi naapeqatigiilerput

- Innuttaasut inatsisitigut “ataataqanngitsut”, pisinnaatitaaffiiagaasutut immikkoortitaasutullu atugaqarlutik misigisut naapeqatigiinnissaat piffissanngorpoq, taamaammat naapeqatigiinnissamik kaammattuivugut, taama nalunaarput tusagassiortoq Tida Ravn naapeqatigiinnissamik isumassarsisuusoq kiisalu ataatani kinaasoq ilisimanagu meeraanini inersimasunngornerminilu sorsuutini pillugit atuakkioqqammersoq, Annso Hardenberg.

- Kalaallit Nunaanni inersimasunik inuppassuaqarpoq uersagaallutik inatsisitigut ataatarsarsiuunneqarsimanngitsunik. Tamanna inuttut allatulli atukkatigut pisinnaatitaaffitsigullu nunarsuarmi maani immikoortitaaneruvoq akuersaaruminaatsoq, allapput, nangillutillu.

- Innuttaaqataasut taamatut toqqaannartumik eqqugaasut naapeqatigiillutik eqqartueqatigiinnissaat maanna pilersaarusiarineqarpoq, oqaloqatigiinninnerup inummut ilorfaallatsitsisarnera qanorlu iliuuseqarusussusermik kinguneqartitsisinnaasarnera iluatinnaateqartutut atorfissaqartinneqartutullu isigineqarmat, oqarput.

Naapeqatigiissitsineq pissaaq Katuami ikinngutigiit inaanni aqagu pingasunngornermi januaarip ulluisa 20-anni unnukkut arfineq-marnut.

Tida Ravnip Annso Hardenbergillu aamma kajumissaarutigaat, nunatsinni inoqatit immisulli uersagaallutik peroriartorsimasut, ataatavimmik kinaaneranik paasiniaanerminni aporfeqartarsimasut, illoqarfimmi najukkaminni naapeqatigiinnissamik aamma aaqqissuissasut.

- Uagutsitulli taamatut eqqugaasut sinerissami aamma naapeqatigiinnissamik pisariaqartitsissagunarmata, Tida Ravn Katuami aqagu pisussamik aaqqissuisoq oqarput.

"Ataataga kinaava?" radioavisimi sammigatsigu kalerrinneqarpugut Danmarkimi inatsisinik atortitsinermut ministereqarfimmit ilisimatinneqarpugut Kalaallit Nunaanni meeqqat aappariinnerup avataani inunngortartut pillugit malittarisassat saniatigut avittarnerup angajoqqaatullu oqartussaassutsip allaffitsigut aqunneqarnera misissuilluarfigineqarnissaa aallartinneqartoq.

Allaaserisat KNR-ip nittartagaani atuarneqarsinnaapput.