UEFAp kanngunartuliaq pillugu FIFA qunusaarpaa

Arsaattartut nunat assigiinngitsuneersut akornanni perulluliortoqarpoq, arsaattartut kattuffissuat FIFA ippassaq kusanaatsiliornermik eqqugaaqqimmat.

En milliard koruunit sinnerlugit peqquserluttuliornikkut iluanaarniarsimasutut FIFA-mi aqqutsisut nuimasut arlaqartut tigusarineqarput, allallu akuusimasutut pasineqarlutik. Nunat assigiinngitsut akornanneersut kattuffianni aningaasanik tapersersortit soorlu Coca Cola, Adidas aamma McDonalds sioorasaaripput tunuarniarlutik. Tuluit arsaattartut kattuffiata FA'p piumasarisimavaa, FIFA'p præsidentiata tunuarnissaa.

Europami arsaattartut kattuffiata UEFA'p eqqarsaatigivaa FIFA'p Zürichimi ataatsimeersuarneranut takutinngivissorniarluni, tassani aqagu Sepp Blatter qinigassanngortissaaq. UEFA'p piumasaraa taassuma tunuarnissaa.
UEFA-mi generalsekretærip Gianni Infantino'p peqquserluttuliorsimanerit qulaajagaammata arsaattartunut kanngusuutitut taavai.

DR-imi arsaanneq pillugu immikkut ilisimasalik Henrik Liniger Zürichimiit ima oqaluttuarpoq:

- Europamiut maannakkut sorsuutigaat FIFA'p præsidentiata pissaaneqaqisup ataatsimeersuarnermi uppisinneqarnissaa. Aamma taarsiullugu UEFA'p eqqarsaatigaa qinersinissaq ukiup affaanik kinguartinniarlugu. Iluatsinngippalli europamiut aalajangertariaqassapput ataatsimeersuarnermit qimagutivissanerlutik, Henrik Liniger nassuiaavoq.

- Taamaaliussappatali iliuuseq sakkortussasoq, DR-imeersoq ilanngullugu oqarpoq.

FIFA eqqornerlunneqarsinnaavoq

Suliniaqatigiiffiit nunarsuup immikkoortuineersut FIFA kattuffigaat, tamakkunani ilaasoq UEFA tassaavoq aningaasaqarnikkut timersornerullu iluani politikki eqqarsaatigalugit pingaarnerpaasoq.

- Taamaattumik europamiut ataatsimeersuarnermut peqataajumanngippata tamanna Sepp Blatterimut FIFA-mullu assorsuaq eqquinerlussaaq, Liniger erseqqissaavoq.

Ilanngullugulu oqarluni ulluni kingullerni pisut pillugit kattuffissuit ima tupassimatigisinnaasut allaat UEFA-tulli ataatsimeesuarnermut peqataajumajunnaarlutik.

- Kisianni imaassinnaavoq aamma ataatsimeesuarneq ingerlaannartoq Sepp Blatterilu qinigaaqqilluni. Pissanganartoraalu taava UEFA qanoq iliussanersoq. UEFAmmi nalunaarutaa malillugu ataatsimeersuaqataarusuinnanngilaq aammali kinguneqartitserusuppoq - UEFA ataatsimeersuaqataassanngilaq imaluunniit FIFA-miit anisariaqarpoq.

FIFA-mi præsidentimut tullersortaasimasoq Jack Warner Trinidad-imi politiinut imminut tunniussimavoq. Taanna FIFA-mi ukiut 24-it ingerlaneranni peqquserluttuliorsimasutut unnerluutigineqartunut 14-inut ilaavoq.

Allat qulingiluat tassaapput siornatigut FIFA-mi suleqataasimasut, allat tallimat avataaneersuullutik.

Amerikamiut unnerluussutaanni 72-inik ukiulik Jack Warner 1998-imi 2010-milu Frankrigimi Sydafrikamilu VM-ertoqarnerani akilersilluni peqquserluttuliorsimavoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat