UEFA-mut FIFA-mullu kalaallit ilaasortaagaluarunik aningaasanik tapiiffigineqartassagaluarput

Kalaallit arsaattartui europamiut arsamut kattuffissuannut UEFA-mut ilaasortaanngillat, taamatuttaaq aamma Nunarsuarmi arsaattartut Kattuffissuanut FIFA-mut ilaasortaanatik. Kalaallit arsaattartui Kattuffissuarnut taakkununnga ilaasortaagaluarunik sungiusartarnissaminnut atatillugu aningaasatigut tapiiffigineqartassagaluarput, taamatuttaaq aamma arsaattarfeqarnikut atortutigut tapiiffigineqartarsinnaassagaluarlutik. Savalimmiormiut UEFA-mut ilaasortaapput, taamaalillutillu arsaaffeqarnermikkut ivigaasanik ikkussuinerminni tapiiffigineqarsimallutik. Kalaallit arsaattartuinut sungiusaasuusoq, Jens Tang Olesen, Radio Avisimiit ullumi aperineqarpoq, UEFA-mut ilaasortanngorsinnaaneq kalaallit arsaattartuinut qanoq kinguneqarsinnaassanersoq.
aggustip 09-at 2007 17:12

Ivigaaraasanik qallersorsimasunik arsaattarfittaartoqa-raluarpat, meeqqat arsaattarnerannut pitsaasumik tamanna kinguneqassagaluarpoq, arsaattarfiit sioraaqqanik qallersukkat ivigaaraasanik qallersorsimasuniit allaanerummata, meeqqallu ivigaaraasanik qallersorsimasunik arsaannerminni annersinnaanerat milleriarujussuassagaluarpoq. Meeqqammi sioraaqqanik qallersorsimasuni arsaatsillutik arsaaffimmi atugassarititaasut qanoq nassataqarsinnaanerat naatsorsoruminaatsorujussuusarmat.

Ivigaaraasanik qallersorsimasuni arsaannermi arsaq qanoq ingerlassanersoq naatsorsoruminarnerusarmat.

Meeqqallu arsalereriaasiat annertoorujussuarmik taamaalilluni siuariarujussuassagaluarpoq.

Nunanut allanut unammisartunut kalaallit arsaattartuinut sungiusaasoq aamma oqarpoq, Nunatta nunat allamiut arsaattartuinik tikeraartoqarnermigut misigisassat pigisai nunat allamiunut qanoq nuannertigissagaluartut soorlu, imaq isikkiviliullugu ivigaaraasanik arsaattarfeqalertuugutta nuannissagaluarmat. UEFA-mut ilaasortanngornitsigut tamakku anguneqarsinnaassagaluarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq