Mila Heilmann Kreutzmann: - Uanga isinnit ajorsartoqanngilaq

Ukioq manna Oscarinnartitsineq tupaallatsitsinertalimmik, illarnermik qullilinermillu aallartinneqarpoq.

Isiginnaagassiani naatsuni pitsaanerpaatut toqqarneqarluni Oscarinnatitsisoqalermat, nunatsinni inuppassuit pissangallutik Ivaluup toqqarneqarnissaanik neriuuteqarlutik isiginnaarsimassajunnarsipput.

Irlandimiulli naatsumik isiginnaagassiaa ´An Irish Goodbye´ toqqagaammat, kalaallit isiginnaagassiaat naatsoq toqqarneqanngitsoorpoq.

´Ivalu´ Oscarinnanngikkaluartoq, innersuunneqarneq annertoqaaq.

- Ajugaanngikkaluarluta kisianni uanga isinnit angisoorujussuuvoq aamma innersuunneqarluni, Oscarimi ajorsartoqanngilaq tamatta nuannaarpugut, Ivalumi pingaarnertut inuttaasoq, aqqanilinnik ukiulik, Mila Heilmann Kreutzmann KNR-imut oqarpoq.

Mila Heilmann Kreutzmannip filmimit tusaamalluarneqartumit Avatarimi inuttaaqataasoq Zoë Saldaña assiliteqatigigaa.

- Filmiliortartugut nunarsuatsinni paasineqarpugut

Ivalu nunatsinni filmiliornerup silarsuaanni sunniuteqangaatsiassasoq, filmiliortartoq film.gl-imilu siulersuisuni ilaasortaq, Ane Lena F. Rosbach isumaqarpoq. Ivaluulli Oscarimut innersuunneqarnissaa taassuma takorloorsimanngisaannaraluarpaa.

- Pinngitsoornani sunniuteqangaatsiassaaq. Pissutigalugu nunarsuatsinni isigineqalerpoq, kalaallit nunaanni aamma filmiliortoqartoq, taanna oqarpoq.

- Allaninngaanniit takuniarneqarnerulissaagut. ilitsersuisoq qallunaajugaluarpoq suleqatigiit sulisut, tamaavimmik kalaaliugamik aamma taanna uani immikkuullarissutigivaa, kalaalerpassuugatta suleqatigiissimasugut. Oscarimut innersuunneqarneq isumaqartorujussuuvoq tamanut, takuneqarpoq. Filmiliortorpassuarnit takuneqarpoq, tanngassimaarnartorujussuuvoq taamatut inissisimasoq, Ane Lena F. Rosbach oqarpoq.