Ualeru pineqaatissiineqassaaq
Eqqartuussinermik aqutsisoq aggersaavoq nalunaaqutaq sisamanut tanneq qulingiluanut. Angutit marluk 37-inik 42-nillu ukiullit ilisimasallillu ippassaq ullumilu apersorneqareersullu taama eqqartuussivimmit ulloqeqqalersoq aalajangerput.
Nuup Eqqartuussiviani suliaq ippassaq ullaakkut aallartittoq ullaaq nanginneqarpoq, tassani ilisimannittoq Danmarkimiittoq killisiorneqarluni.
Saqqummiinerit apersuinerillu ippassaq paasinarsisippaat, David Fiskerip juulliaraq aqaguttoq aalakoorluni aallaamaqalunilu 37-nik ukiullip inaanut unnerluussat isersimasut ataasiaannarani ornittarsimagai, iseraangamilu saassuteqqittarsimallugu. Unnerluussaasut aappaata 42-nik ukiullip inaanukarsimapput, tassanilu eqqissisaramik isumaqatigiissimapput David Fisker uteqqissagaluarpat susinnaajunnaarsinnissaanut atugassatut timmiarsiutit arlallit piareersassallugit, taamaaliorsimappullu.
Juulliaqqap ullaani arferngup missaani David Fisker isernialersimavoq matuersaatini aanerarlugit. Ingerlaqquneqaraluaramilu ingerlasimanngilaq, matulu tukerlugu isermat 42-nik ukiullip niuatigut aallaasimavaa, David Fiskerillu niumini taqarsuarmigut eqqortinnermi kingunerisaanik aavernini pissutigalugu Dronning Ingridip Napparsimmavissuani ullaakkut kingusinnerusukkut toquvoq.
Aassiornerani paasineqarpoq David Fiskerip timaa 3 promillemik aalakoornartoqartoq. Unnerluussat imigassartorsimanngillat.
Unnerluussisut unnerluunneqartut toqumik kinguneqartumik nakuusersimasutut ukiuni aappaata affaani ukiunilu pingasuni pineqaatissinneqarsimasunut inissisarfimmiinnissaat piumasaraat, illersuisuisa pinngitsuutinneqarnissaat piumasarigaat.
