Ualerngup Tarajuata imartaani (Beufort Havemi) USA aalisaqqusiunnaarpoq
USA-mit ilimagineqarpoq aalisakkat piujuaannarnissaat taamaaliornikkut anguneqassasoq.
USA-lli inerteqquteqalersitsinissamik aalajangiitinnani Canada siunersioqqaarsimanngimmagu tamanna canadamiut ajornartorsiutitut isigaat. Imaq 11.500 kvadratkilometerip missaa suli isumaqatigiissutiginiarneqarpoq. Tassa Alaskap avannarpasissuani immap ilaa, tamaanngaanniillu kangimut USA-p Canadallu imartaata killeqarfiata tungaanut imaq, nunamut sorlermut atanersoq Canadap USA-llu suli isumaqatigiissutiginngilaat. Amerikamiulli aalisaqqusiunnaarnerat immami tamaani tassa atuuppoq, taavalu Ualerngup Tarajuata imartaata ilaa aamma ilaalluni.
Canadami nunanut allanut tunngassuteqartunut ministeriaqarfimmeersoq, Alain Cacchioni, oqarpoq, Canadap namminersortuunerata taavalu Canadami Issittumi imartanut pisinnaatitaaffiit oqaluttuarisaanikkut pilersinneqarlutillu tunngaveqartut - Canadallu namminersortuunera pissutigalugu USA-p illuinnaasiorluni iliuusaa iluarineqanngitsoq - minnerunngitsumillu eqqarsaatigineqartariaqartoq aalisakkat piujuaannarnissaat anguniarlugu Canada immaqa allatut aaqqeerusussasoq.
Canadap USA-mut akissutaa pisarnermit makitaneruvoq, Canadammi issittortai USA-miinnaanngitsoq, aamma Ruslandimit maanna ilungersuutigineqaleruttormata.
