Festivali Outervision Uaajeerneq tarnikkullu peqqissarneq
Qitittariaaseq jazz. Balleterneq kalattoornerlu.
Workshoppini, tassa sungiusaanerni meeqqat, inuusuttut inersimasullu sungiusarsinnaasaasa ilaat.
Sungiusaanerni qitik kisiat ilikkagassaanngitsoq, Alexander Montgomery-Andersenip festivalimik pilersitsiniarnermik suliaqartuusup oqaatigaa:
- Timersorneq, imaluunniit timigissarneq, nukiit atorlugit tasitsaarlugit peqqinnartumillu sungiusarluni. Aamma qitik aqqutigalugu ilukkut makku misiginikuusagut inuunitsinni annisissinnaallugit, suliarisinnaallugit. Aamma parnaarussaajunnaartutut misigilluni.
Festivalimi qitittartut nunani avannarlerneersut arfinillit sungiusaallutik sulissapput qitimmillu takutitsisaqattaassallutik. Festivalernerlu ulluni makkunani Nuummiippoq, kingusinnerusukkullu Maniitsoq, Kangaamiut, Kulusuk Tasiilarlu aamma taama misigisaqarfiussapput.
Kiffaanngissuseq
Qitimmik sungiusartut ilaat kulturip illorsuani Katuami KNR-ip naapippaa, qitikkaangamilu qanoq misigisaarnersoq aperaarput:
- Soorlu qileruteqanngitsunga, arfineq marlunnik ukiulik Marius Villadsen oqarpoq, qitinnerlu allatigut iluaqutissartaqartoq oqaatigalugu:
- Inunnik allanik naapitsiffissaavoq nuannisaqatigiittaarlutalu.
Qitittariaatsit assigiinngitsut tamanit nuannarineqarlutillu alutorineqartarput. Soorlu meeqqanit nukarlernit hip hop-imik qitinneq balleternerlu nuannarineqarnerusarput. Aamma:
- Inuit ikattut aamma nunatsinninngaanneersut avataaninngaanneersullu nuannarisorujussuusarpaat uaajeerneq kalattoornerlu misilillugu. Taava inersimasut tango soqutigineqarnerpaajulluni, Alexander Montgomery-Andersen, qitinnermik ilinniagaqartoq oqarpoq.
Qitinneq misigissutsinik takutitsinissamut periarfissaalluarsinnaavoq:
- Oqaatiginiakkap timimik takutissinnaanissaa pingaaruteqarluinnarpoq, oqaasiinnarniunngitsoq, tassami inuiaqatigiinni oqaatsit atorlugit attaveqatigiikkajuppugut, qitittartoq festivalimilu sungiusaasoq Marie Lykkemark oqarpoq.
Isiginnaagassiaq Nuummi suliarineqarsimasoq "Evoke", ukioq manna Festivalimi immikkuullarissortaavoq.
