U-21-mi pissartanngorniunnerni eqqiluisaarnissaq aamma pisariaqarpoq
- Pikkorinnerit ilaanniinniarluta soorunami misilissavarput. Holland aamma Libya ajugaaffigisinnaassagutsigit nuannissaqaaq. Sungiusaasup piumasarivaa unamminerni assoroortassasugut. Sukataarniarpugut, pissanganassaarlu qanoq ingerlajumaarnersugut, Aqqaluk Sørensen oqarpoq.
Kalaallit Nunaat sisamanngorpat unammeqqaassaaq, Estlandimut unammisoqassagami.
Arsartartut katillutik 16-iupput.
Arsartartut sungiusaasuat Jacob Andreassen oqarpoq aasaq manna sungiusarluarsimallutik, Silkeborgimilu katersuuteqammerlutik. Tassani sapaatip-akunnera sungiusaqatigiipput.
Igitsinimi kiattaqaaq, tamannalu aamma eqqarsaatigisariaqartoq, sungiusaasup oqaatigaa, nerisallu aamma nakkutigilluarneqarnissaat pingaaruteqarpoq, arsartartut naarlulernaveersaartinnissaat aamma suliniutigineqassalluni.
Kalaallit Nunaat gruppe C-mi inissisimavoq, Sverige, Estland, Slovenia, Holland aamma Libya unammisussaallugit. Arsarluarunik Holland aamma Libya ajugaaffigineqarsinnaassasut Jacob Andreassenip ilimagaa, neriuutigalugulu.