Tûkkakkut assingi Odensemi saqqummersinneqalerput
Isiginnaartitsisartummi nunarsuaq tamakkerlugu tusaamasaasut, Tûkak’ Teatret, pillugit assit Odensemi Kalaallit Illuutaanni aqagumiit saqqummersinneqassapput. Tûkkakkut kalaallinut inuusuttunut sunniuteqarsimaqaat, inuusuttorpassuarnillu isiginnaartitsisartutut ilinniartitsisimapput.
Tûkkakkut Kalaallit Nunaanni siullersaallutik isiginnaartitsisartutut ilinniagaqarnissaminnut 1975-imi akuerisaapput. Eqqumiitsuliortoq, assiliisartoq atuakkiortorlu, Ole Jørgensen, Inuit kulturiat pillugu ilaatigut atuakkiorsimasoq, Tûkkakkunni avammut paasissutissiisartut pisortaattut ukioq taanna aamma atorfinitsinneqarpoq.
Tûkkakkunni isiginnaartitsisartut, taakkulu piffissami tassani takutitsisarsimaneri, Ole Jørgensenip assilisarsimavai, tassalu assit taakku Odensemi aqagumiit saqqummersinneqassapput.
Saqqummersitsineq Kalaallit Illuutaanni, Café Allumi, aqagu ualikkut nalunaaqutaq pingasunut ammarneqassaaq, Ole Jørgensen aamma najuutissalluni. Saqqummersitsineq Kalaallit Illuutaata nalinginnaasumik ammasarfiani maajip ulluisa aallaqqaataata tungaanut ingerlassaaq.
