Tûgdliup uparuarneqarnera nutaajunngilaq

Kommuneqarfik Sermersuumi taamanikkullu Ilaqutariinnermut Peqqissutsimullu Naalakkersuisoqarfiumi isumakuluttoqarmat, Tûgdlimmut 2009-mi februaarimi maajimilu nakkutilliiartortoqarpoq.

Februaarimi nakkutilliinerup kinguneranik arlalinnik naammasiniagassaqarpoq, soorluttaaq nakkutilliiartortut tamarmik pissutsit isumakulunnarnerannik ersersitsisut. Isorisalli aaqqinneqanngillat, maajimilu kalerreeqqaarani nakkutilliiartortoqaqqippoq.

Kommuneqarfik Sermersuumi - kommunini Tûgdlimmut meeqqanik inissitaqarnerpaasumi - immikkoortortami pisortaq inerniliinermili Radioaviisimiit kalaallisuunngortitatsinni ima allappoq:
”Umiarsuaaraq atuarfiutigisoq meeqqanut inuusuttunullu taama ajoqusersimatigisunut inissiivigissallugu ullutsinni naleqqukkunnaarsimasoq. Umiarsuaaqqap sannai ajortorujussuupput,  aammalu meeqqanut inuusuttunullu taama amerlatigisunut piukkunnaratik". issuaaneq naavoq. Immikkoortuni pisortaq aamma allappoq, "Naalagaaffiit Peqatigiiit meeqqat pillugit aalajangersagai arlalitsigut unioqqutinneqartut".

Isornartorsiutit ilagaat, ilinniarsimasunik naammattunik, pisarialinnnillu piginnaasalinnik, sulisoqanngitsoq. Umiarsuaaqqap sannaasa ineqarfiginissaa piukkunnarunnaarsimanerarpaa. Umiarsuaaraq angalarpiarneq ajorpoq. Meeqqallu aningaasat kaasarfimmiussaat pillaatitut arsaarinnissutigineqartarput.

Kommunip naalakkersuisoqarfiullu nakkutilliiartortui inerniliipput, Tûgdlik meeqqanik inuusuttunillu najugaqarfigineqaannassappat, atugassarititaasut malunnartumik pitsanngortariaqartut.
Kisianni 2011-mi nakkutilliiartornernit nalunaarusiat takutippaat, pissutsit ilarpassui suli atuuttut.

Taavalu apeqqutaalerpoq, pissutsit ukiuni arlalinni isorineqaraluartut sooq angerlarsimaffik atuutiinnarnersoq?

Aaqqitassanik naammasinneqqusineq kukkusumik tunngaveqartoq, Tûgdliup eqqartuussissuserisua Ilaqutariinermut Peqqissutsimullu Naalakkersuisoqarfimmut 2009-mi juunip ulluisa arfineq pingajuanni allappoq.

Tûgdlik Radioaviisimi sammeqqissavarput.