Tûgdliup eqqartuussisuserisua: Ingerlatsinermut inatsit unioqqutinneqarpoq

- Akuersissut ukioq manna maajip aallaqqaataaniit atorunnaarsinneqartussatut aalajangerneqarpoq, aalajangiinermullu tunuliaqutaasut amigarput, Tûgdliup eqqartuussisuserisua Finn Meinel oqarpoq.

Paaqqinniffimmi pissutsit Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmit isumakulunnartorujussuunerarneqarput. Nakkutilliineq pillugu nalunaarut naapertorlugu marlunngormat taama nalunaartoqarpoq.

Pissutsit suut pineqarnersut, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisumit, Mimi Karlsenimit, Tûgdliulli eqqartuussisuserisuanit, Finn Meinelimit, itisilerneqarumanngillat.

Finn Meinelilli oqaatigaa pissutsit pineqartut iluarsineqareersut, Namminersorlutillu Oqartussanit misissorneqarsimanngitsut.

Pissutsit isumakulunnartutut nalilerneqaraangata, iluarsisariaqartutullu nalilerneqarlutik, taava iliuarsiinissamut piffissaliisoqartarpoq, iluarsisassallu iluarsereerpavut, Namminersorlutillu Oqartussat takussutissat iluarsiisimanermut tunngasut takusimanngilaat, Finn Meinel, KNR-imut oqarpoq.

Umiarsuaaqqap saniatigut, Nuup Kangerluani Qooqquni, Tûgdlik aamma pigisaqarpoq, immikkoortortanullu sisamanut aggulunneqarsimallutik.
Pissutsit immikkoortumi ataatsimi atuuttut Namminersorlutik Oqartussanit taamaallaat takuniarneqarsimasut, Finn Meinelip oqaatigaa, Tûgdliup matuniarneqarnera uparuartorlugu.
Periutsit tamakku Ingerlatsinermut inatsisimmik unioqqutitsinerusut, Finn Meinelip oqaatigaa.

- Ingerlatsinermut inatsit unioqqutinneqarujussuarpoq, tuaviuussaasumillu iliuuseqartoqartoq isumaqarpugut, eqqartuussisuserisoq oqarpoq.

Akuersissummik atorunnaarsitsinissamik aalajangiineq Tûgdlimmit maanna naammagittaalliuutigineqarpoq, kukkusoqarsimaneranillu nassuertoqarnissaa aamma neriuutigineqarpoq, Tûgdliup ulloq unnuarlu paaqqinnittarfittut atorneqaqqilersinnaanissaa neriutigineqarluni.