Tûgdlik pillugu kommuni naammaginartumik iliuuseqarsimanerarpoq

- Isorineqarsinnaasumik peqarsimappat soorunami oqaluuserisarparput, nalilersortarlugillu. Isorineqarsinnaasutut nalilikkavut aaqqiiviginiarneqartut nalunaarfigineqartarnikuuvugut. Aaqqiiviginiarneqarmatalu tamanna naammagineqartarsimavoq, Kommuneqarfik Sermersuumi Tungiuinermut pisortaq, Aaja Chemnitz Larsen, Tûgdlimmi pissutsit pillugit kommunip suliaqarsimanera pillugu oqarpoq.

Ulloq unnuarlu angerlarsimaffimmik kommuni ukiuni kingullerni nakkutilliisarsimasoq, taassuma erseqqissaatigaa, pisariaqartitallu aaqqiivigineqartarsimanerat tikkuarlugu.

Suulliukua kommunip nakkutigisarsimagai?

- Eqqiluisaartoqarsimanersoq assersuutaasinnaavoq, uagullu isumaqarpugut eqqiluisaartoqarsimasoq, Aaja Chemnitz Larsen oqarpoq.

Taanna aperaarput meeqqat sulisunit attortittarsimanerannik ilisimaneqarnersut, oqaatigaalu attortissimasumik ataatsimik ilisimasaqarsimallutik. Attorneqarsimasulli unnerluussinini taamaatiinnarsimavaa. Kommuneqarfik Sermersuumi inunnik isumaginninnermut siunnersortip ippassaq unnukkut Radioaviisimut ilaatigut oqaatigaa Tûgdlimmik suleqateqaannarnermut nassuiaataasinnaasoq inissiiffiusinnaasunik amigaateqarnerujussuaq. Aaja Chemnitz Larsenilli tamanna ilumuunnginnerarpaa, ilanngulluguli oqaatigaa ulloq unnuarlu angerlarsimaffinnik piorsaasoqartariaqartoq. Tûgdlimmilu pissutsit pillugit Kommuneqarfik Sermersuumit naammaginartumik iliuuseqartoqarsimanersoq Aaja Chemnitz Larsen aperigatsinni oqarpoq:

- Paasissutissat pissarsiarisimasagut malillugit isumaqarpunga naammaginartumik iliuuseqarsimasugut, Kommuneqarfik Sermersuumi Tungiuinermut pisortaq, Aaja Chemnitz Larsen oqarpoq.