Tysklandinimi atuartoq atuaqatiminik toqoraaniaq paasineqartoq
Pisup takutippaa Finlandimi peqqammersutut, atuartut atuaqatiminnik aallaarsarinnittarnerat nuannaartorineqartartoq. Tysklandimili takutinneqarpoq pilersaarutit taamaattut unitsinneqarsinnaasut siusinaarluni iliuuseqaraanni.
Ukiut arfineq-pingasut matuma siorna Coloradomi Columbine Highimi atuartut atuaqatitik aqqaneq-marluk ilinniartitsisorlu ataaseq inuartareriarlugit allallu 23-t ikileriarlugit imminorput. Ullullu 14-t matuma siorna Finlandimi ilinniarnertuunngorniat ilaat puuarrallappoq atuaqatinilu arfineq-marluk, ilinniartitsisorlu ataaseq aallaallugit. Taassuma pisussaq pilersaarusioreersimavaa ilaatigut atuarfimmi namminerlu aallaasisarluni assini internetimut ilisarsimammagit. Aqagulu assinganik Tysklandimi pisoqangajalluinnarpoq, atuartut marluk Kølnimi Geobygnerip atuarfiani pilersaarsimagaluarmata, Tysklandimi atuarfimmi allami ukiut tallimat matuma siorna alla atuaqamminik tallimanik inuartarinneriarluni imminortoq eqqaaniarniarlugu. Taamali pisoqaleraluarnera atuaqataanit eqiigasunit pinngitsoortinneqarpoq. Atuaqataasup malugilersimavaa, inuarniarluni pilersaaruteqartoq Coloradomi pisoq ilaaqqinnaarlugu inuuneqalersoq. Atuarfiup ittuanut nalunaarmata erngiinnaq politiit attavigineqarput 17-ninillu ukiulik paasineqarami oqarpoq mianersoqqusiniarluni internetimut assinik ilioraasimalluni. Kinguninngua 17-nik ukiulik politiinit iperarneqarpoq, politiit isumaqarmata inuusuttoq taanna atuaqatiminik ilinniartitsisuminillu ulorianartorsiortitsisinnaanngitsoq. Politiilli qimakkamigit angerlamulli ingrlatilluni 17-nik ukiulik imminorpoq sporvognit ingerlasut siornanut pissikkami nanertillunilu. Pisoq tuppatigalugu politiit misissuinertik nangeqqimmassuk imminortup peqatigisimasaa 18-nik ukiulik tigusarineqarpoq paasinarsimmat imaannaanngitsunik pisoqartitsinissamut eqqarsaqataasoq. 18-nik ukiulik tigusaagami oqaatigaa ikinnguteqarpiarani atuaqatiminillu qinngasaartittarluni. Atatiinnarlugu 18-nik ukiullip nassuerutigaa ullumiummat imminortoq 17-nik ukiulik peqatigalugu atuaqatiminnik aqagu toqoraassamaarsimagaluarlutik. Politiit nukappissat angerlarsimaffii misissuivigigamikkit nassaraat sakkut assigiinngitsut kiisalu atuartut ilinniartitsisullu aalajangersimasut aqqi, qularnanngitsumik inuartarineqartussaasimagaluartut. Nukappiaqqalli taama sakkortutigisumik akeqqersimanerannut sunarpiaq pissutaanersoq suli paasineqanngilaq.
