Tysklandimiu 1987-imi periarfeerunneqartoq Schweizimi qaqqap sermiani nassaarineqartoq
Tysklandimiu asimi angalaartilluni ukiut qulikkuutaat pingasut matuma siorna periarfeerunneqartoq Schweizip kujataata-kippasinnerusuani nassaarineqarpoq. Angutip toqungasup timaa qaqqap sermiani nassaarineqarpoq.
Schweizip ilaani Valaisimi politiit oqaatigaat angutip kinaassusersineqanngitsup timaa toqungasoq asimi angalaartunit marlunnit sapaatit akunnerata siuliani nassaarineqartoq.
Qaqqap sermiani Hohlaubimi, qaqqap Matterhornip kangiani kilometerinik qulinik ungasitsigisumiittumi, angutip assaa kamiilu siumoriarsaarsimavaat.
Misissuisoqarneratigullu angut kinaassusersineqarpoq, tassalu angut 45-t missaannik ukioqarluni 1987-imi aggustip aqqarngani periarfeerunneqartoq.
Valaisimi politiit oqaaseqartartuata Markus Reiderip oqaatigaa angutip ilaqutai ilisimatinneqareersut.
Schweizimi oqartussat inuit periarfeerunneqarsimasut timaannik toqungasunik sermip aputillu iluaniittunik arlalinnik piffissami kingullermi nassaarsimapput.
Oqartussallu isumaqarput nunarsuup silaannaata kissatsikkiartornera pissutigalugu qaqqat sermii aakkiartulersut.
Tamatumalu asimi angalaartillutik periarfeerunneqarsimasut nassaarisinnaanissaat ilimanarnerulersippaa, Rieder taama oqarpoq.
Aappariit Schweizimiut ukiuni 75-ingajanni periarfeerunneqarsimasut oqartussanit qaammatip siuliani aamma nassaarineqarput. Taakku Hohlaubimit kilometerinik 70-inik ungasitsigisumi qaqqap sermiani Tsanfleuronimiitillutik periarfeerunneqarsimapput.
Aappariit paniat, 79-inik ukioqartoq Marceline Udry-Dumoulin, oqaluttuarpoq angajoqqaani 1942-mi aggustip 15-iani periarfeerunneqartut. Taakku pisullutik nersutaatinik nerukkariartorsimavaat uteqqinngisaannarlutillu.
/ritzau/AP
