Tysklandimi socialdemokratit kinguariarput
Naak Angela Merkelip qinersinermi ajugaaneq kisimiilluni angusarinngikkaluarlugu, Tysklandimi ukiuni sisamani Kanslerioqqinnissamik qulakkeerinninnini nuannaarutigiinnarsinnaavaa. Ukiunili sisamani kingullerni naalakkersuisooqatigisimasaani nipitusaartoqarpallaanngilaq.
Tysklandimimi Socialdemokratit qinersisartutik 6 milliuunit annaasimavaat, tassami qinersisartui 34 procentiniit 23 procentinut appariarsimapput, sorsuunnersuullu kingulliup qaangiunneraniit aatsaat taama qinernikitsigipput.
SPD-llumi kanslerissatut piukkussaa nunanut allanut ministeri Frank Walter Steinmeyer, allatut ajornartumik unneqqarittariaqalerpoq.
- Tysklandimi Socialdemokratinut ajorsarneq tujorminartuuvoq, taama qinersereernerup kingorna katerisimaarnermi nuannaarfiusussaagaluartumi
Frans Münterseering oqaaseqarpoq.
Taassuma tunuarnissi aamma eqqarsaatiginagu naqissuserpaa.
Kina nutaaliortunngussanersoq, qaqugulu Tysklandimi socialdemokratinut siunissaq aallartissanersoq ullumi ataatsimiilerpata pinngitsoorani oqaluuserineqarluassaaq.
- Partiimi qangali siuttuusut, tassa Steinmeyer aamma Münterseering tunuaannassanersut apeqqutaavoq, ilaatigut Berlinimi overborgmesterip Klaus Oberreichip tamanna piumasaraa, immaqa nammineq siuttunngornissamut piukkoornini eqqarsaatiginerullugu, taama naliliivoq Københavnip universitetiani prorektoriusoq Lykke Friis, nangillunilu:
- Sulili pingaaruteqarnerusoq unaavoq, tassa SPD-mit saamerliusunut qanoq pissusilersortariaqarpa? Sulimi isiginngitsuusaaginnarlugit pineqassappat? imaluunniit 2013-imi qinersinissamut tullermut saamerliit aamma de grønne qanillattorneqassappat? Taama Lykke Friis DR-imut oqarpoq.