Tysklandimi ikiorsiissutit ikigineqarput
Meeqqamut minnerpaamik akiliutissamut aammattaaq aningaasat sunngiffimmi sammisassanut inuttullu ataatsimoornissamut ilaasariaqarput, eqqartuussivik taama isumaqarpoq, DR allaaserinnippoq.
Sumiikkaluarunilluunniit inersimasutulli aningaasanik pisariaqartitsipput, meeqqanullu 14-it tikillugit ukiulinnut inatsisini tunngaviusuni piumasaqaatit naammassineqarsimanatik. Tysklandimi inatsisitigut aaqqissuussinermi eqqartuussivik ullumi suliassami angajoqqaanit aappariinnit pingasunit eqqartuussivikkut suliassanngortitami taama erseqqitsigisumik aalajangiivoq. Taakkua ilaatigut sivisuumik suliffissaarusimanerminni pisortanit pisartakkatik naammagittaalliuutigaat, pingaartumillu meeqqanut akigititat ikippallaarnerat naammagittaalliuutigalugu. Tunngavilersuutaat tassaavoq ikinnerpaamik akiliutigineqartartut ukiuni arlalinni atuuttut piviusorsiortuunngissusiat. Meeqqat taamaallaat atisanik nerisassanillu pissarsissanngillat, aammali allat assigalugit atuarfimmi sunngiffimmilu sammisassani kiisalu inuttut ataatsimoortumik aaqqissuussinerni peqataasariaqarlutik, maannakkulli ikiorsiissutigineqartuni taamaaliorsinnaanatik, naliliineq taamatut oqaatigineqarpoq. Eqqartuussiviup isumaginninnermi ikiorsiissutit qanoq amerlatiginissaat isummerfiginngilaa, naatsorsuinermulli tunngavigineqartut piviusorsiortuunngilluinnarnerarlugit. Naalakkersuisut tamatumani ukiut nikinnissaanni tulliuttumi pissutsinik aaqqiissuteqaqqullugit piffissalerneqarput. Maanakkorpiaq tyskit 6,7 millionit isumaginninnermit ikiorserneqartarput, taakkunanngalu meeqqat 14-it inorlugit ukiullit 1,7 millioniullutik. Naatsorsuinerit naligiinngissusiannut assersuutit ilagaat atisassanut, angalaarnernut, lejrskoleqarnermut ataatsimoortumillu aaqqissuussinernut allanut naammattunik aningaasaliisoqarneq ajormat, akerlianilli meeqqat tamarmik inunngornerminniit qaammammut 141 kroninik tupasiutissanik imigassarsiutissanillu pissarsisarlutik.
