Tysklandimi ikinnerpaamik 15-it ullumi ajunaarput

Tysklandimi politiit taama nalunaartut Ritzauimit oqaatigineqarpoq.

Sulluliami tusarnaartitsivimmut isaaffiusumi inuppassuit utaqqisut akornanni uiverneq aallartissimavoq.

Ajunaartut 15-it tummaattarineqarnertik toqqutigaat.

- Allaanngilaq sorsuffimmiilluni. Sumi tamaani toqungasoqarpoq, inuillu annilaarsimaqisut nakkussillutik, isiginnittut ilaat tv-qarfimmut RTL-imut taama oqaluttuarpoq.

Politiit oqaatigaat ajunaartuni qulingiluat arnaasut angutillu arfiniliullutik.

Aqqunartitersimasut qassiunerat erseqqissumik oqaatigineqarsinnaanngikkallarpoq. Politiit 15-iunerarpaat, Duisburgimi oqartussat 45-uuneraraat Tysklandimilu tusagassiorfiit arlallit 100-t sinneqarnerarpaat.

Taama pisoqarnerata kingorna oqartussat tusarnaartitsineq matunngilaat, suli annerusumik uivertoqalernissaa ernummatigigamikku. Tamatumunnga taarsiullugu ajornartorsiulernermi aniffissat ammarneqarput, bussillu inunnik qimarngussuitinneqarlutik.

Tusarnaartitsinersuaq ualimut marlunut ammarneqarpoq, unnuarorneranilu aatsaat naammassisussaalluni.

Aaqqissuisut oqaatigaat tusarnaartitsinersuarmut inuit 1,4 millionit tusarnaariarlutik takkussimasut, uivernersuarlu aallartimmat inuit millionip affaasa missaat takkussuutereersimasut.