Tysklandimi coronavirusimik tunillanneqarsimasut 3 millionit sinneraat
Tysklandimi coronavirusimik tunillanneqarsimasutut maannamut nalunaarsorneqartut 3 millionit maanna sinnerpaat.
Ilisimatusarfiup Robert Koch Institutip, coronavirusip tuniluunneranik nakkutilliisuusup, kisitsisaataani ataasinngornermi ullaakkut takuneqarsinnaavoq.
Tysklandimi coronavirusimik tunillanneqarsimasutut ullup unnuallu kingulliit ingerlaneranni nalunaarsorneqartut katillutik 13.245-pput.
Inuit 99-it coronavirusimik Tysklandimi ullup unnuallu kingulliit ingerlaneranni toqquteqarsimapput, katillutillu 78.452-it nappaat maannamut toqqutigisimallugu.
AAMMA ATUARUK Merkelip Tysklandimi killilersuinerit februaarip 15-ianut sivitsorniarai
Tassa imaappoq, Tysklandimi inuit 100.000-ugaangata 94-it nappaat toqqutigisarpaat. Danmarkimullu sanilliukkaanni tamaani inuit 100.000-ugaangata 41-t nappaat toqqutigisarlugu.
Coronavirusit allanngorsimasut assigiinngitsut tuniluutilertornerat pissutaallutik coronavirus Tysklandimi pingajussaa tuniluutilertoqqileruttorpoq.
Tysklandimi forbundskanslerip, Angela Merkelip, Tysklandimi nunap immikkoortuini assigiinngitsuni siuttut internetikkut attaveqaatit aqqutigalugit ullumi ataasinngornermi ataatsimeeqatigissavai, coronavirusip Tysklandimi tuniluunnera tassani oqaluuserineqassalluni.
Tysklandimi killilersuinerit nutaat atuutilersinneqassanersut aamma oqaluuserineqassaaq.